भांगरभूंय | प्रतिनिधी
पी. एन. कृष्णनः केरळांत मनयलो कोंकणी मान्यताय दीस
भांगरभूंय । खबरां मेज
पणजीः फक्त उलोवचें न्हय. वाचन आनी लेखन तितलेंच गरजेचें आसा. केरळ सरकारान घडयिल्ली कोंकणी साहित्य अकादमी आतां निश्क्रीय जाल्या. ते खातीर बेगिनात बेगीन नवी कार्यकारी समिती घडोवची अशी मागणी केरळ कोंकणी अकादमीचे अध्यक्ष पी. एन. कृष्णन हांणी केली.
केरळ कोंकणी अकादमी वतीन कोंकणी मान्यताय दीस मनयलो. टी. डी. वाय. संकुलांत आयोजीत केल्ले कार्यावळीची यजमानकी अकादमीचे अध्यक्ष पी. एन. कृष्णन हांणी चलयली. ह्या वेळार ते उलयताले.
तिरुमला देवस्थानाचे अध्यक्ष बी. जगन्नाथ शणै हांणी दिवली पेटोवन कार्यावळीचें उक्तावण केलें. भारताच्या संविधानाचे आठवे वळेरेंत कोंकणीक आस्पावीत केल्यार 30 वर्सां जाल्ल्या निमतान कृष्णन हांणी सगळ्यांक परबीं भेटयली.
कोंकणी शिक्षणाक मजत जावची हे खातीर गोंयांत ऑनलायन वेवस्था केल्या, अशी म्हायती केंद्रीय साहित्य अकादेमीचे वांगडी पय्यनूर रमेश पे हांणी दिली. यत्ता पयली ते चवथी मेरेनच्या विद्यार्थ्यांक फायदो जातलो अशा ऑडियो पुस्तकाची तांणी वळख करून दिली.
शिक्षिका आशा एस, पालक शिक्षक संघाचे अध्यक्ष शैलेश ए पै हांणी ह्या नव्या प्रयोगाक येस मागलें.
सुरवेक कृष्णश्री पी. कामत आनी इरा पी. भट हांणी कोंकणींत प्रार्थनागीत सादर केलें. अकादमीचे सरकार्यदर्शी चंद्राबाबू यू. शेट्टी हांणी येवकार दिलो. केरळांत राज्य पांवड्याचेर चलपी युवासृजोनोत्सवांत कोंकणी विशय जाय, अशी मागणी शिक्षण खात्या कडेन केली.
स्पंदन कोंकणी म्हयनाळ्याचे नवे प्रबंधक टी. आर. सदानंद भट हांणी उपकार मानले. अध्यापक सुधीश शणै हांणी सुत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
