उपास- तापास

भांगरभूंय | प्रतिनिधी

व्रत करपाचें आसल्यार जाता तितलें उदक पियेवचें. निर्जळा व्रता पयलीं ही जतनाय घेवपाक जाय.

उपास, सोंवळें- ओंवळें, व्रतां चड करून बायलां करतात. माथ्या वयल्यान न्हावन धुवून थोडीं एक केळें आनी दुदाची च्या पिवून उपा करतात. थोडीं दनपरां जेविनात. नवरात्रांनी तर एक – एक बायल णव दीस उपास करता. देवाची पुजा, आराधना, जप करतात. ह्या व्रतांच्या काळांत आपली भलायकी सांबाळप बरें. कूड निरोगी, घटमूट दवरप बरें. थोड्यांक उपास म्हणलो काय थाकाय येता. घुंवळ येता. दोळ्यां मुखार काळोख येता. अस्वस्थ जातात. हाका जायतीं कारणां आसपाक शकतात. 

बरोच वेळ कांयच खायनात, पोट रिकामी उरता. भुक मारता तेन्ना कुडींतली ग्लुकोजाची पातळी कमी जाता. मेंदू सारकें काम करीना. त्या वेळार ग्लुकोज सम प्रमाणांत जाय पडटा. ग्लुकोज कमी जायत जाल्यार अचकीत घुंवळ येता. कांयजाणा निर्जळा व्रत धरतात. ह्या वेळार उदक कमी पियेल्ल्यान ही समस्या उद्भवता. उपाशी रावल्यार कुडीचे मेटाबोलिझम मंद जावन रक्त घोळप कमी जाता. ह्या वेळार तकली फोडप, घुंवळ येवप, पुरो जावप ह्यो समस्या तकली वयर काडटात. सदांच सकाळीं च्या पियेवपाची, गोड खावपाची संवय आशिल्ल्यान व्रताच्या काळांत उपाशी राविल्ल्यान हे त्रास जातात. किरकीर जाता.

सकल्यांत पयली गजाल मतींत दवरप ती म्हणल्यार धर्मीक व्रतां करतना आदीं आपले भलायकेचो विचार करप खरेंच बरें. उपासा आपल्याक जमतले काय, हो प्रस्न मनाक विचारप बरें. जाका डायबेटीस, थायराॅयड, रक्तदाब, अशक्तपणा आसा वा कसलीय शारिरीक व्याधी आसा तांणी उपास करप ना. ताचे परस सात्विक आहार घेवन नामजप करप. रामाचो जप, स्तोत्र पठण, ध्यान धारणा, सप्तशती पाठ, हनुमान चालिसा ह्या सेवा वरवीं देवीची आराधना करप बरें. 

व्रत करपाचें आसल्यार जाता तितलें उदक पियेवचें. निर्जळा व्रता पयलीं ही जतनाय घेवपाक जाय. सामान्य उपास आसल्यार साबुदाणो खिचडी, शेंगदाणे खावप, आडसराचें उदक पियेवप, लिंबू सरबत, थंड ताक पियेवप बरें. दोन- तीन केळीं खावप उपासाक बरें. च्या- काॅफीय पियेव येता. रोसाळ फळां, मक्याचें कणीस, काळिंग, मोसंबी असलीं फळां बरीं. उपास करतना शारिरीक काम करप ना. वेळार न्हिदप, प्राणायाम करप, मीठ, साकर घाल्लें उदक पियेवप. 

व्रत केल्यार जिवाक बरें दिसता. उर्जा कायम उरता. ताकाच लागून म्हणटात- आरोग्यम धनसंपदा. 

– सिद्धी तिळवे