भांगरभूंय | प्रतिनिधी
पणजी, प्रतिनिधी: पुलीस उपअधीक्षक पदाचे भरती संबंदी जाल्ल्या गोंदळा विशीं स्पश्टीकरण दितना गोंय लोकसेवा आयोगाचे (जीपीएससी) अध्यक्ष जुझे नोरोन्हा हांणी स्पश्टीकरण दिलां. पुलीस उपअधीक्षक पदाच्या (डीवायएसपी) भरती प्रक्रियेंत पिरायेची कसलीच अट ना. विवीध कॅटेगरी प्रमाण सरकारान पिरायेचे अटींचेर सवलत दिल्या. ते प्रमाण प्रक्रिया सुरू आसा अशें तांणी सांगलें.
जायरातींत २१ ते ३० पिरायेच्या गटांतल्या इत्सूक उमेदवार उपअधीक्षक पदाक पात्र थारतले. पूण, सरकारी कर्मचार्यां खातीर ही पिरायेची अट नेमां प्रमाण शिथील केल्या. दिव्यांग आनी अनुसुचीत जाती/जमाती, ओबीसीं खातीरूय सरकारी नेमां प्रमाण सवलत दिल्या. जनरल कॅटॅगरी खातीर ३० पिराये सकयले पिरायेचे उमेदवार अर्ज करपाक शकतात. नेमां प्रमाण जनरल कॅटेगरींतल्या सरकारी कर्मचार्यांक ३५ पिराये मेरेनूच अट शिथील केल्या. जाल्यार हेर कॅटॅगरींतल्या उमेदवारां खातीर चडांत चड ४० वर्सां मेरेन पिरायेचे मर्यादेंत सूट दिल्या, अशी म्हायती नोरोन्हा हांणी दिली.
मजगतीं, इत्सूक उमेदवारांक अर्ज करपा खातीर ८ सप्टेंबर मेरेन मुदत दिल्या. २८ पदां मदलीं १४ पदां सर्वसाधारण गटा खातीर जाल्यार ८ पदां हेर मागास वर्गीयां खातीर, ४ अनुसूचीत जमातीं खातीर आनी २ अर्थीक मागास वर्गा खातीर राखीव आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
