भांगरभूंय | प्रतिनिधी
प्रवीण आर्लेकारः पेडणें पालिका बसकेंत टपाल इमारत प्रकल्पाच्या आराखड्याक मंजुरी
भांगरभूंय । प्रतिनिधी
पेडणें: पेडणें पालिकेक जो निधी मेळटा तो सगळ्या प्रभागांक समान प्रमाणांत दिवचो आनी पेडणें पालिकेची उदरगत करची. उदरगत करतना कसलेच तरेचो भेदभाव पालिका मंडळान करचो न्हय, अशी सुचोवणी पेडणेंचे आमदार प्रवीण आर्लेकार हांणी पेडणें पालिका मंडळाचे बसकेंत केली.
बिरेस्तारा 3 नोव्हेंबराक पेडणें पालिका मंडळाची बसका जाली. नगराध्यक्ष माधव सिनाय देसाय हांचे अध्यक्षते खाला जाल्ले बसकेंत नियुक्त वांगडी म्हूण आमदार आर्लेकार हाजीर आशिल्ले. तशेंच उपनगराध्यक्ष तृप्ती सावळ देसाय, नगरसेविका अश्विनी पालयेंकार, उषा नागवेंकार, विशाखा गडेकार, राखी कशालकार, नगरसेवक सिद्धेश पेडणेंकरा, शिवराम तुकोजी, मनोज हरमलकार, विष्णू साळगांवकार हाजीर आशिल्ले. पालिका मुख्याधिकारी मनीष केदार हाची दुसरे कडेन बदली जाल्ल्यान आनी तांकां अतिरिक्त ताबो आशिल्ल्यान ते हे बसकेक हाजीर रावपाक शकले ना.
कांय मेजकेच नगरसेवक पालिके खातीर आयिल्लो निधी वापरतात आनी आपल्या प्रभागाची उदरगत करतात. मात पांच नगरसेवकांक काळखांत दवरून आयिल्लो निधी वापरतात. आमकां पांच नगरसेवकांक विस्वासांत घेनासतना कांय निर्णय घेतात, असो आरोप बसकेंत नगरसेवक विष्णू साळगांवकार हांणी केलो. हाचेर नगराध्यक्षाक सुचोवणी करतना आमदार आर्लेकार हांणी सांगलें, हे मुखार अशें जावपाक जायना. आयिल्लो निधी सगळ्यांक समान प्रमाणांत दिवचो. विवीध विशयांचेर जाल्ले चर्चेंत पेडणें पालिका वाठारांतले पोरण्या टपाल कार्यालयाचे इमारतीचो मुद्दो आयलो. गोंय मुक्तीच्या भांगरा उत्सवी वर्सा निमतान मेळिल्लो निधीचो वापर ह्या इमारत प्रकल्पाचेर करचो आन सुसज्ज टपाल इमारत बांदची, अशें थारलें. इमारती खातीर तयार केल्लो आराखडो बसकेंत मांडून ताका नगरसेवकांनी एकमतान मंजुरी दिली. ह्या प्रकल्पा कुशीक पोरणो ट्रान्सफोर्मर आसा, तो थंयचो काडपा संबंदांतूय ह्या वेळार चर्चा जाली. ते खातीर संबंदीत वीज खातें कार्यालया कडेन पत्रवेव्हार करचो आनी जे सोपस्कार आसात ते पुराय करचे, असो निर्णय बसकेंत घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
