उदरगतीचीं नवीं सपनां पळोवया

भांगरभूंय | प्रतिनिधी

गोंयचे अर्थिक सर्वेक्षण अहवाल पळेल्यार तीच- तीच म्हायती, आंकडे मात्शे बदलून दितात हें होल्मतलें.

मोपा विमानतळाचे बराबरीन आयुष हाॅस्पिटल- म्हाविद्यालय, संशोधन केंद्राचें उक्तावण जालें. शिक्षणाची नवीं दारां ह्या
हाॅस्पिटलांतल्यान गोंयकारांक उगतीं जातलीं. आतां सरकारान दक्षीण गोंयां खातीर नव्या वैजकी म्हाविद्यालयाचो संकल्प करचो. द. गोंयचें नवें हाॅस्पिटल बांदतना तशी येवजण आसली. ते प्रमाण बांदावळय जाल्या. कोविडा वेळार हाॅस्पिटल सुरू जालें. जीएमसीच्या दोतोरांनी सेवा दिली. निवृत्त सरकारी दोतोरांच्या आदारान द. गोंयचें हाॅस्पिटलच न्हय जाल्यार वैजकी म्हाविद्यालय फुडें व्हरपाक जाय. गोंय वैजकी शिक्षण संचालनालय बांदावळी खातीर दोतोरां कडेन भासाभास केल्यार आयुर्वेद, होमिओपथी, अॅलोपथी, फार्मासी शिक्षण घेवपाक, विद्यार्थ्यांच्या अॅडमिशना खातीर नवे सरकारी यंत्रणेची वेवस्थाय करूंक मेळटली.
प्रादेशिक, राजभाषेक उर्बा दिवपी शिक्षण नितीचें म्हत्व पालकांक सांगचें पडटलें. अंदूं सावन मुळाव्या शिक्षणाच्या पांवंड्यार नवी शिक्षण निती आपणावचीच पडटली. ताचो आरंभ नसर्रींतल्यान जावचो. हेर राज्यां प्रादेशिकताय सांबाळून मुखार वतना शिक्षण, वेवसाया खातीर दुसऱ्या राज्यांतल्या येतात तांणी मायभास, राजभास शिकची म्हणून तजवीज करतात. गोंय सरकारानय ते खातीर पावलां मारल्यांत, पूण मुळावें शिक्षण इंग्लेजींतल्यान घेवपी विद्यार्थी संख्या वाडत आसा ती कित्याक? आयुर्वेदांतय इंग्लेजीचें वारें आयलां. आयुर्वेद काँग्रेस, आयुर्वेद एक्स्पोंतल्या एसी (एअरकंडिशन्ड) माटवांतल्यान ताची जाणवीकाय जाली. आयुर्वेद एक्स्पोंत आयुर्वेदा विशीं पुस्तकां, म्हायती पत्रकां इंग्लेजींतल्यान दिसलीं, लॅपटाॅपच न्हय जाल्यार म्हायती तंत्रज्ञानाचो व्हड उपेगय आयुर्वेदांत करतात हेंय पळोवंक मेळ्ळें. योग साधने बराबरीन गोल्फ खेळून मनशांती कशी मेळूं येता, तें आयुर्वेद एक्सपोंत कितल्या जाणांनी आयकलें, पळयलें?
सैम आनी आयुर्वेदाचें व्हड नातें आसा. आवाळे, बिमलां, करमलांचे लोणचें, आवाळ्याची सुपारी गोंय जैव विविधताय मंडळान आयुर्वेद एक्सपोंतल्यान देस, विदेसांतल्या प्रतिनिधींक दाखयली. माड, आंबे, काजूपरस आवाळे, चिचेचीं झाडां बदामाच्या झाडांपरस गोंयच्या म्हामार्गां कुशीक लावपाक जाय. कोविडान हाडिल्ल्या वातावरण बदलांचो अभ्यास करून विद्यार्थ्यांच्या मदलशींच्या खाणांतय वेगळेपण हाडपाक शिक्षकांच्यो, पालकांच्यो सुचोवण्यो आयकून घेवप बरें. गरजे भायर जेवण, खाण करप ना, भायर उडोवप ना हें गोंयकारांनी शिकचें पडटलेंच. शाळेंतल्यान मदलशींचें खाणें सगले विद्यार्थी खातात तसलेंच आसचें नाजाल्यार फकत सरकारी शाळांनीच तें दिवचें.
संवसारांत, देसांत शिक्षणावस्था बदलता. बदला वांगडा गोंय, गोंयकार आसतलेच. बदलांक, उदरगतीक गोंयकारांनी ना म्हणूंक ना, पूण उदरगतीचो लाव कितल्या गोंयकारांक मेळ्ळा? अंदूचो गोंय मुक्तीदीस मनयतना उदरगती पसून पयस उरिल्ले खंयचे वाठार (गांव) आसात तें सोदपाचो येत्न करूंक जाय. थंय कोण रावतात? लोकसंख्या कितली? भलायकी, शिक्षण सुविधा पावल्यात?… हाचो नियाळ करचो. 100 टक्के साक्षरतायेची मोख सरकाराक दवरची पडटली. ते खातीर राजभासेंतल्यान सगल्या जाती, धर्माच्या लोकांक शिक्षण दिवप गरजेचें.
देस पावंड्या वेल्यान निती आयोगाच्या अहवालांत दिल्ली म्हायती कांय वेळा दुबाव घेवपा सारकीच आसता. गोंयचे अर्थिक सर्वेक्षण अहवाल पळेल्यार तीच- तीच म्हायती, आंकडे मात्शे बदलून दितात हें होल्मतलें. पंचायतींकडल्यान तोच वावर करून घेतल्यार वेगळीच म्हायती मेळटली. सरकारा कडेनय अचूक म्हायती पावोवप हें समेस्तांकय करपाक येता, ते खातीर ल्हान बसकांची निती आसची.
मोपा विमानतळा वेल्यान येरादारी सुरू जावचे आदीं पर्यटनाची कूस बदलपा खातीर सरकाराची तयारी जाल्या? पर्यटन गांवांत व्हरचें पडटलें, दर्यादेगो मेकळ्यो करच्यो पडटल्यो, गांवांचो विकासच न्हय साधनसुविधांचे बांदावळीक संद आसा, पूण ते खातीर पयलीं लोकांक विश्वासांत घेवचें.
सांगें, सत्तरी, काणकोण, दिवचल तालुक्यांतल्या गांवगिऱ्या वाठारांक शिस्तीच्या नियोजनांतल्यान उदरगती कडेन व्हरप शक्य आसा. मुक्ती उपरांतय ह्या तालुक्यांनी फाव ती उदरगत जावंक नाशिल्ल्यान उंचेलें शिक्षण घेतिल्ले चड बेकार आसतले. सांग्यार आयआयटी जावची अशें मंत्र्यांक दिसलें तरी ‘कुशळटाय शिक्षणाचें विद्यापीठ’ हो वाठारच कित्याक जावचो न्हय? आयुष हाॅस्पिटल आयिल्ल्यान गोंयचे आदले आयुर्वेद, होमिओपथी म्हाविद्यालयांचेर परिणाम जावपाची शक्यताय आसतलीच. पदवे उपरांतच्या शिक्षणा खातीर आयुष उपकाराक पडलें तरी पदवी मेरेनचे शिक्षणय त्याच म्हाविद्यालयांत घेवचें, अशें दिसल्यार पयलींच्या म्हाविद्यालयांचें कितें हाचो अभ्यास करचो.
पेडणे तालुको अस्तंत घांट वाठारांत येता, ह्या तालुक्यांतले जैव विविधतेच्या उपेगांतल्यान आयुष शिक्षण, संशोधनाकच न्हय जाल्यार आयुर्वेद फार्मासी उद्देग ह्याच तालुक्यांत येतले. इलेक्ट्राॅनिक्स, म्हायती तंत्रज्ञान उद्येगीक वसाहतीक बळगें दिवप, वर्सा भितर चडांत चड उद्येग हाडप, स्टार्ट अप्सांक मजत करप हें सरकारा मुखार आव्हान आसा.
बदलांतल्यान सपनां केळयतना गोंयचो गरीबय गिरेस्त जावपाक शकता, पूण कायद्यांक धरूनच तशें जाल्यार, आशिल्ल्या सैमाचें जतन करतना नवे सैमीक संपदेक जल्म दिल्यार गोंय स्वयंपूर्ण जातलें. सैमातले बदल पळेल्यार वर्साचे स म्हयने पावस पडत, अशी भिरांत आसाच. दक्षीण दर्यादेगे वेल्या राज्यांतल्यान देख घेवन गोंयान सादूर जावपाक जाय, आपत्ती वेवस्थापनाच्या शिक्षणाचो कुशळताय शिक्षणात आसपाव करपाक जाय.
नवे शिक्षण नितींत भुरग्यांतली कुशळताय सोदपाचो वावर शिक्षकांक करचो पडटलो. ते अभ्यासक्रमांत बदल हाडपाक शिक्षक समित्यो जाय. निवृत्त शिक्षकांक आसपावन घेवन कुशळतायेच्या विद्यापीठाचें नियोजन जावचें. हवाई येरादारीचेंच न्हय विमानां, हेलिकाॅप्टरां मोडल्यार तीं सारकीं करपाक मनीसबळ जाय, तातुंतल्यान वेवसाय कुशळताय केंद्रां उबारचीं पडटलीं.
सपनां पळोवप सोपीं, तीं पळयतनाच मनीस घडटा, पूण ते प्रक्रियेंतल्यान मनीसपण शेणचेना ही जतनाय घेवपाची जापसालदारकी सरकारा वांगडा समेस्तांचेरय आसा.
गोंय मुक्तीदिसाचो सुवाळो लागीं पावला, व्हड कार्यावळी परस सान कार्यावळीच जावच्यो. मुक्तीदिसाची, सैमीक बदलाची व्हडवीकाय नाच, गायनांतल्यान सांगपाचो तोखणायेचो वावरय कांय संस्था, संघटना करतात. नाच, गायनाचे कार्यावळींतल्यान सत लोकां मेरेन पावयतल्यांक सरकार आदीं अर्थिक अनुदान दितालें. आदलेवरी कार्यावळ जाताच अशें ना, पूण सरकारान नेमावळ केल्यार तिका पाळो दिवपाक जाय. तांचेर नदर दवरपाचो वावर ग्रामसमित्यांनी केल्यार, गांवच्याच लोकांनी संघटना, संस्थांक तांची लागणूक शिकयल्यार उदरगतीक नवी दिका मेळटली. सैमांतल्या बदलां विशीं नागरिकांनी सरकाराक कळयल्यार स्वयंपूर्ण येवजणेक बळगें मेळटलें.

सु हासिनी प्रभुगांवकार
9881099260