भांगरभूंय | प्रतिनिधी
-भौशीक बांदकाम खात्यांत जातलें विभाजनः मुख्यमंत्र्यांची घोशणापणजीः गोंय सरकारान भौशीक बांदकाम खात्याचें विभाजन करपाचो निर्णय घेतला आनी पियेवपाचें उदक पुरवणे खातीर वेगळें खातें तयार जातलें. हाचे फुडें दर दिसा उण्यांत उणें चार वरां गोंयच्या लोकांक उदका पुरवण करपाची जापसालदारकी ह्या खात्या कडेन आसतली अशीं घोशणा मुख्यमंत्री डॉ. प्रमोद सावंत हांणी बुधवारा केली.
पर्वरी मतदारसंघांतल्या साल्वादोर द मुंद वाठारांत 3.50 कोटी खर्चून बांदिल्ली उदकाची टांकी आनी उदका पुरवण सुविधाच्या उक्तावणा वेळार मुख्यमंत्री डॉ. प्रमोद सावंत उलयताले. ह्या वेळार पर्यटन मंत्री आनी पर्वरीचे आमदार रोहन खंवटे आनी थळावे सरपंच, पंच वांगडी हजर आशिल्ले.
आपणाक सांगपाक खोस भोगता, भौशीक बांदकाम खात्याचे आमी विभाजन करतात आनी पियेवपाचें उदक खातें हे नवीन खातें अस्तिवांत हाडटात, अशे मुख्यमंत्र्यांनी सांगलें.
हे खातें फकत उदका खातीरच काम करतलें. भौशीक बांदकाम खातें व्हडले आशिल्ल्यान रस्तो, इमारत सारकिल्ले गजालींचो तातूंत आस्पाव आशिल्ल्यान उदकाचेर उणो लक्ष वतालो. हे खातें बेगिनूच अस्तिवांत येतलें आनी ज्या अभियंत्याक ह्या खात्यांत वच्चे दिसतां तांणी बेगीन वच्चे आनी थंय बडटी लेगीत तांकां बेगीन मेळटली. सक्षम अभियंते घेवन आमी ह्या खात्याचेर लक्ष दिवपाचें थारायला, अशी म्हायती मुख्यमंत्र्यांनी दिली.
गोंयकारांक उण्यांत उणें चार वरां सेगीत उदक दिवपाचें सरकाराचें धोरण आसा. ते खातीर आमी काम करीत आसा. नवीन पियेवपाचें उदका खातें जाहीर केलां ते बऱ्या भशेंन हाचेर काम करतलें आनी लोकांक उण्यांत उणें चार वरां उदक दितलें. उदका स्रोत खातें उदक जलाशयांत घालतले आनी तातुंतल्यान उदकाची पुरवण करपाचें काम हे म्हजें नवीन खातें करतलें, अशें मुख्यमंत्र्यांनी सांगलें.
उदक आमच्या जलाशयांत हाडून सोडप ही उदका स्रोत खात्याची जापसालदारकी आसा आनी तांणी जर हें काम केलें ना जाल्यार तांचेर योग्य ती कारवाय जातली. थोड्यां दिसांनी कांय जाणांक हाची जाणविकाय जातली, अशींय शिटकावणी मुख्यमंत्र्यांनी दिली.
फुडल्या 25 वर्सांचें व्हीजन मतींत दवरून गोंय उदकाचें बाबतीत स्वयंपूर्ण जावचे खातीर आमी स्वताची उदकां स्रोतां तयार करपाचेर भर दिवपाचे यत्न करतात. आमी कितलीशीच वर्सा तिळारीच्या उदकाचेर निंबून आसात. आमी नवे कानाल बांदल्यात, पूण महाराष्ट्राचे हद्दीत 30 किलोमिटर लांब कानाल आसा तो मदींच फुटलो आनी उदक सगळे भायर व्हावन वचपाक लागले. ते खातीर लोकांक थोडें त्रास जाले, अशें मुख्यमंत्र्यांनी सांगलें.
——————–
गरजे पुरते उदक वापरातः मुख्यमंत्री
जे लोक 16 क्युबीक लिटर उदक वापरतात तांकां बीलच येवचें ना. गोंयातले 40 टक्के लोक 0 बील येता जाल्यार 60 टक्के लोक उदकाचे बील फारीक करतात. चार जाणांची फामिलीक 16 क्युबीक लिटर उदक पुरो आसा. लागता तितलेंच उदक तुमी वापरचें, बेठेच माड शिंपपाक आनी गाडयो धुंवपाक उदक वापरु नाकात. आमका 20 रु. दर क्युबीक लिटर इतल्या उदकाचेर प्रक्र्रिया करपाक खर्च येता. म्हळ्यार 17 रुपया लुकसाण सोंसून उदकाचेर प्रक्रिया केले उपरांत उदक तुमकां सरकार दिता, अशें मुख्यमंत्री प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
