भांगरभूंय | प्रतिनिधी
देशांतलो सगल्यांत चड गुन्यांव दर गोंयांत आसा, अशी खबर येतकच सरकारी यंत्रणां जागी जाली, तें बरें जालें. गोंय उडटें दवरपांत कांय भायल्या लोकां वांगडा आमचे नीज गोंयकारूय जापसालदार आसात, हें आतां सगल्यां सामकार आयलां. ते दरेकल्यान मानून घेवचें. ह्या ‘उडटा गोआ’ चीं पांखां कापले बगर आमच्या राज्याचे पांय जमनीर येवचे नात. उदक नाका मेरेन पावलां तें पळोवन सरकारी यंत्रणाच न्हय, तर पुराय समाजाकूय खडबडीत जागें जावचें पडटलें. ‘म्हाका कित्याक पडलां तें’, म्हणीत ओल्तेरार पांय हालयत, धोलत बसले जाल्यार पोंदची जमीन नाच्च जावन, आमचो केन्ना मोरया जायत, तें प्रत्यक्ष परमेश्वराकूय सांगपाक येवचें ना. इतली परिस्थिती इबाडल्या.
काल स्वता मुख्यमंत्री डाॅ. प्रमोद सावंत पुलीस मुख्यालयांत गेले. डीजीपी आनी हेर वरिश्ठ अधिकाऱ्यां वांगडा बसका घेतली. तांणी घुंवळे वखदां विशीं खर पावलां उबारपाचो आदेश दिला. पर्यटन मोसम चलता. फुडल्या तीन म्हयन्यांत तो तेंगशेर आसतलो. ‘लोहा गरम है, मार दो हथौड़ा’. हीच संद आसा. बोल्सां घट्ट शिवून पुलीस आनी संबंदीत खात्यांच्या सरकारी अधिकाऱ्यांनी दर्यादेगांचेर गस्त घालीत जाल्यार एफआयआराचे डायरेंत गडप जाल्ले ‘राॅय, जाॅय, बाॅय’ सगले सांपडटले. घुंवळे वखदांचें फक्त ‘घुं…’ आयकून गुन्यांवकारांक घुंवळ येतली इतली जरब दर्यादेगां वयल्या ह्या माफियांक, देशद्रोह्यांक बसपाक जाय! लेट नायट पार्टींचेर आतां पुलिसांक लक्ष दवरपाक सांगलां. मात, हें करतना पुलिसांच्या हातांत ‘वाॅशिंग्टनाची कुराड’ दिवची न्हय. कारण पर्यटनाचेर ताचो थेट परिणाम जावपाक शकता. पूण, ह्या पार्ट्यांनी घुंवळें वखदांचो वापर जावचो ना, हाची जतनाय पुलिसांक घेवची पडटली. रातच्यो पार्ट्यो जातात. मागीर अपघात जातात. पुलिसांच्या वेगवेगळ्या विभागांनी हातांत हात घालून काम केल्यार सोबीत गोंयाच्या पोल्यार उदेल्लें हें खत सोंपेपणी ना करूं येता. जाय फक्त इत्साशक्त…. आनी सरकारी यंत्रणेंतल्या कांय जाणांक ती नासता.
पुलिसांनी जप्त केल्ल्या 100 कील (इतलेंच?) ड्रग्साचो विलो लावपाचें थारायलां. हें जाहीरपणान करचें. ड्रग्सांचो वेव्हार करतात, असो दुबाव आशिल्ल्या तिगांक पुलिसांनी ताब्यांत घेतल्या. तांकां 1 वर्साची कोठडी मेळपाक शकता. ड्रग्सां विशींचो संदेश उच्च माध्यमीक विद्यालयां, महावि्दयालयांच्या विद्यार्थ्यां मेरेन वचपाक जाय. ते खातीर खासा कार्यावळी घेवं येतात. ड्रग्साचे वायट परिणाम आनी ते बोल्सांत सांपडल्यार कितें परिणाम जावं येतात, तें तांकां कळपाक जाय. ड्रग्स घेतना सांपडत जाल्यार वर्सभर बंदखणींत बसचें पडटलें, हो भंय पातळत जाल्यार समाजांतली ही कीड इल्ली उणी जातली. फक्त आनी फक्त सोंपेंपणी मेळपी पयशांक लागून बरेच लोक ह्या धंद्यांत देंवल्यात.. तांकां सालामार्काची भायरी दिले बगर सरकारान आतां ओगी बसचें न्हय. नाजाल्यार ते मुखार येवप्यांकूच तांबयो घेवन धांवडावपाची शक्यताय चड आसा. ताची सुरवात आतां जाल्याच. गुन्यांवांनी चड प्रमाणांत घुस्पल्यात ते परप्रांतीय. सत्य. पूण तांचे ‘पात्रांव’ कोण ताचोय सोद घेवचो पडटलो. कारण खंयच्याय खेड्यांतल्यान कोणूय हांगा येवन रोखडोच ड्रग्स विकपाक शकना. ताचे तकलेर कोणाचो तरी वरदहस्त आसतलोच. ते नदरेन तपास करचो पडटलो. दर्यादेगांचेर कसलेंच काम, धंदो करीनासतना कुबेराक लज दिसतली अशा झेतान जगतात, तांचोय इतिहास, भुगोल तपासपाचो वेळ आयला.
‘नायट लायफ’, ‘नायट टुरिझम’ अश्यो वेगवेगळ्यो संकल्पना येत आसात. मात ‘काळखांत पाप जाता’ अशें म्हणटात, तशें कांयशें थंय जाल्लें दिश्टी पडटा. बलात्कार, खुनाचीं प्रकरणां घडल्यांत तीं रातचींच. दर्यादेगां वयलीं पुलीस फौज वाडयत जाल्यार, गुन्यांवांचेर नियंत्रण येवं येता. कांय नेटिझनांच्या मतान, पुलीस आनी हेर सरकारी यंत्रणा बोल्सां गरम करून हे वेव्हार आसा तशेच चलोवपाक दिवं शकतात. मात, शिता फुडें मीठ खावन न्हयकारात्मक विचार करचे परस फुडले तीन म्हयने घुंवळे वखदां आनी हेर नाका जाल्ल्या धंद्यांचेर बडी मारून तरी पळोवया. जाल्यार जालें गोंय नितळ.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
