उदकाचें चुकीचे पद्दतीन रिडींग घेवन लोकांक लुटपाचो प्रकार

भांगरभूंय | प्रतिनिधी

सरकारान हो घोळ थांबयलो ना जाल्यार न्यायालयांत वचूं

गिरायक नरेंद्र सुतार, वैभव बिरजे हांची शिटकावणी

म्हापशें: उदकाचें मिटर रिडींग चुकीचे पद्दतीन घेवन भौशीक बांदकाम खात्याच्या उदका पुरवण विभागा कडल्यान बिलाच्या नांवांन लोकांक लुटपाचे प्रकार जायत आसात. मिटराचो निमाणचो डिजीट लेगीत युनीट म्हूण नोंद जाता आनी ते वरवीं हजारांनी रुपयांचें बील गिरायकांक दितात. हो गोंय सरकारान मोटो घोटाळो चलयला आनी हातूंत योग्य सुदारणा करून हो घोळ थांबयलो ना जाल्यार न्यायालयांत याचिका दाखल करूं अशी शिटकावणी वेर्लाचे गिरायक नरेंद्र सुतार आनी वैभव बिरजे हांणी दिल्या.

उदका पुरवण विभाग जून 2015 सावन चुकीचे पद्दतीन मिटर रिडींग करीत आमचे कडल्यान हजारांनी रुपया म्हयन्याच्या बिलाची रक्कम वसूल करता. फाटल्या सात वर्सांत साडेचार लाख रुपया आमचे कडल्यान घेतल्यात. अशीच रक्कम चुकीचे पद्दतीन हेर गिरायकां कडल्यानूय वसूल करीत आशिल्ल्याचें दिसून आयलां. जून 2022 त 654 युनीटा प्रमाण 40 दिसांचे 16350 रुपया आनी थकीत रक्कम म्हणून 1 लाख 90 हजार 430 रुपया बील दिलां.

जानेवारी 2015 वर्सा नवो मिटर बसयले उपरांत म्हाका 158.7 युनीटाचे फक्त 22 रुपया बील आयिल्लें. पूण जून 2015 सावन मात पांच डिजीट मिटरांतलो पांचवो आंकडो लेगीत युनीट म्हूण नोंद करपाक सुरवात केली. ताका लागून युनीट आनी बिलाची रक्कम वाडली. हो मिटर रिडिंगेचो प्रकार गिरायकांचेर अन्यायकारक आनी लुबाडणूक करपी प्रकार आसा अशें सुतार आनी बिरजे हांणी म्हणलें.

सुमारा भायर येवपी बिलाचें 2015 सावन ते जून 2022 मेरेनचो स्टेटमेंट घेतले उपरांत मिटर रिडींग चुकीचे पद्दतीन घेतात हें दिसून आयलें. उदका पुरवण विभागाच्या अधिकाऱ्यांनी हो मिटराचो दोश आशिल्ल्याचें वेळावेळार सांगलें. ते प्रमाण मिटराचीय तपासणी केली. पूण तातूंत कसलोच दोश नाशिल्लो. निमाणें हो मिटर रिडिंगेचो दोश आशिल्ल्याचें स्पश्ट जालें. शंबर लिटर उदकाचेर एक डिजीट नोंद जाता. जेन्ना धा युनीट जातात तेन्ना 1 हजार लिटर उदक जाता. पूण मिटर रिंडीगे वेळार पांचवो डिजीट लेगीत युनीट म्हूण नोंद जाता. जेन्ना धा युनीट जातात तेन्ना 1 हजार लिटर उदक जाता. पूण मिटर रिंडीगे वेळार पांचवो डिजीट लेगीत युनीट म्हूण नोंद जायत आशिल्ल्यान चार वांगडी कुटुंबाक दर म्हयन्याक 13 ते 18 हजार मेरेन बील येता. ताका लागून हें उदक 45 ते 48 रुपया प्रति लिटर पडत आसून, बाजारांत विकतात त्या उदकाचे बाटले परस दुपेटीन, तिपेटीन हो दर आसा असो दावो वैभर बिरजे हांणी केलो.

ह्या वाडट्या बिलाच्या प्रकारा विशीं आमी म्हापशेंच्या सहाय्यक अभियंतो कचेरे कडेन कागाळ केली. तशेंच 11 नोव्हेंबराक आरटीआय अर्जाच्या माध्यमांतल्यान जे कंपनीन हे उदकाचे मिटर बसयल्यात तांणी मिटर रिडींग नेमके कशें घेवचें आनी पांचवो डिजीट कितें नोंद करता हाची म्हायती मागली. पूण ही म्हायती दिली ना. हो दोश सोदपा खातीर आमी एका बॅरलांत 1300 लिटर उदक भरलें. तेन्ना 1.3 युनीट नोंद जावंक जाय आशिल्लें. पूण मिटर 13 युनीट दाखयतालो.

उदका पुरवण विभागान आतां आमी आवाज केले उपरांत नवो मिटर बसोवन एक म्हयनो निरिक्षण करुया आनी उपरांत रिंडिंगांत दोश दिसून आयल्यार फाटल्या सात वर्सांतली चड बिलाची रक्कम माफ करपाची हमी अधिकाऱ्यांनी दिल्या. ते प्रमाण आमी नवो मिटर बसयला. मिटर रिडींग घेवपाचे चुकीचे पद्दतीनूच हो प्रकार घडला आनी लोकांनी मुखार येवन मिटर रिडींग घेवपी कर्मचारी कशे पद्दतीन मिटर रिडींग घेतात हाची प्रत्यक्ष पळोवणी करून चवकशी करची आनी भरमसाट बील येवचें ना हाची खात्री करून घेवची अशें आवाहन नरेंद्र सुतार हांणी केलां.

गोंयांत मिटर रिंडींगेंत घोळ करतात. मिटराचो निमाणो डिजीट लेगीत युनीट म्हूण नोंद करतात. हाका लागून सुमारा भायर उदकाचे बील येता. प्रति लिटरा फाटल्यान 45 ते 48 रुपया लोकांक मेजचें पडटात. गोंयांत सोऱ्याच्या मोला परस चड मोलांत उदक दितात असो दावो वैभव बिरजे हांणी केलो.