भांगरभूंय | प्रतिनिधी
912 गुन्यावांचो तपास पूर्ण, तपासाची टक्केवारी 82.48
भांगरभूंय I उमेश झर्मेकार
म्हापशेंः उत्तर गोंयांत जानेवारी ते सप्टेंबर ह्या णव म्हयन्यांत भारतीय दंड संहितेच्या कलमा खाला 1,142 गुन्यावांच्या प्रकरणांचो तपास पुराय जाला. तपास पुराय जाल्ल्या गुन्यावांचें प्रमाण 82.48 टक्के आसा. हे गुन्यांव उत्तर गोंयांत पणजी, म्हापशें, दिवचल, वाळपय, पेडणें, कळंगूट, हणजूण, आगशी, पोरणें गोंय, पर्वरी, साळगांव, कोलवाळ आनी मोपा अशा 13 पुलीस स्टेशनांनी नोंद जाल्यात.
खून, लिंगीक अत्याचार, चोरी, घरफोडी, जिवेशी मारपाचो हल्लो, अपहरण, सरकारी कर्मचाऱ्यांक मारपेट हे सारक्या मुख्य गुन्यावांचो तपास 86.24 टक्के पुराय करपांत पुलिसांक येस आयलां.
ह्या णव म्हयन्यांच्या काळांत उत्तर गोंयांत 15 खून, सात जिवेशी मारपाचे हल्ले, 30 लिंगीक अत्याचार, तीन सदोश मनीसवध, दोन दरोडे हे सारके 57 गंभीर स्वरूपांतल्या गुन्यांवांची नोंद जाल्या. हातूंतल्या एका खून आनी लिंगीक अत्याचाराचे प्रकरण वगळ्ळ्यार सगल्यां गुन्यांवांचो तपास पुराय जाला.
चोरी 11, भरदिसा 9 चोरयो, रातच्या वेळार 22 चोरयो, 49 वाहनांची चोरी, 8 भांगरा वस्ती फारावप, 79 हेर चोरयो मेळून वट्ट 285 प्रकरणांतल्या 178 चोरयांचो तपास पुलिसांनी लायला. ही टक्केवारी 62.45 आसा.
फटवणुकीचे 85 गुन्यांव नोंद जाल्यात. तातूंतल्या 68 गुन्यांवांचो तपास लागला. विस्वासघात केल्ले प्रकरणांत 10 गुन्यांवांतल्यान सात गुन्यांवांचो तपास लागला. दंगल घडोवन हाडून मारपेटीच्या 29 गुन्यांवांनी दुबावितांक अटक केल्या. अपहरणाचे 38 प्रकार घडल्यात. तातूंतल्या 33 गुन्यांवांचो तपास पुराय जावन दुबावितांक अटक केल्या.
वयल्या काळांत 55 प्राणघातक अपघात घडले. घरांत घुसखोरीचे 10 गुन्यांव घडल्यात. ह्या सगल्यां गुन्यांवांचो तपास करपाक पुलिसांक येस आयलां. दुखापतीचे 128 गुन्यांव घडल्यात. 126 गुन्यांवांचो तपास पुराय जाला. सरकारी कर्मचाऱ्यांक मारपेटीचे प्रकार 17 घडल्यात. तातूंतल्या सगल्यां गुन्यांवांचो तपास पुराय जावन दुबावितांक अटक केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
