भांगरभूंय | प्रतिनिधी
पणजीः चिंबलाच्या जंक्शना लागसार परतून परतून अपघात जातात आनी तातूंत लोकांक मरण येता. पूण सरकार ताची कसलीच दखल घेना. थंय उड्डाण पूल बांदचो, हे खातीर आमी मुख्यमंत्री तशेंच थळाव्या आमदारा कडेन निवेदन दिलां. पूण अजून कांयच जावंक ना. आतां आमची सोशीकसाण सोंपल्या. खंयच्याय खिणाक हो रस्तो येरादारी खातीर बंद करपाक शकता, अशी शिटकावणी चिंबलकारांनी शेनवारा मेणवात मोर्चो काडून दिली.
शुक्रारा एका 59 वर्सां पिरायेच्या मनशाक सायकली वयल्यान वतना कदंबा बशीन धपको मारलो. ह्या धपक्यान ताका मरण आयलें. ते आदीं मे म्हयन्यांत थंयच चिंबलच्या एका मनशाक अपघातांत मरण आयिल्लें. तशेंच स वाहनांचो विचित्र अपघातांत एका तरणाट्याक मरण आयिल्लें. मे म्हयन्यांत थंय थळाव्या लोकांनी आंदोलन केल्लें. त्या वेळार थळाव्या आमदारान दोन म्हयन्यांत उड्डाण पूल बांदतले अशें सांगिल्लें. रस्त्याचेर फक्त स्पीडब्रेकर घातले, आनीक कांयच करूंक ना, अशें चिंबलकारांचें म्हणणें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
