भांगरभूंय | प्रतिनिधी
ट्रॉलर धनयाची पुलिशेंत कागाळ, दुबावितां आड गुन्यांव
म्हापशें: बेतीं हांगासरल्या मालीम जेटी वयल्यान उडुपी कर्नाटकांत व्हरपा खातीर खरेदी केल्ल्या नुस्त्याची रक्कम दिनासतना एका ट्रॉलर धनयाक 1.24 कोटी रुपयांची तोपी घाली. ह्या प्रकरणांत पर्वरी पुलिसांनी दोगां आड गुन्यांव दाखल केला.
ह्या प्रकरणांत आंतोनिओ सिल्वेरा (माल्वारा-आगशी) हांणी पुलिशेंत कागाळ दाखल केल्या ते प्रमाण, पुलिसांनी दुबावीत आरोपी एमएस युसूफ आनी मोहम्मद फहीम (रा. उडुपी-कर्नाटक) हांचे आड भादंसंच्या 406 आनी 420 कलमा खाला गुन्यांव नोंद केला.
पुलिसां कडल्यान मेळिल्ले म्हायती प्रमाण हो फटवणुकीचो प्रकार फाटल्या ऑक्टोबर 2021 ते फेब्रुवारी 2022 मजगतीं घडलो. कागाळदाराचो नुस्तेमारी ट्रॉलर आसून तो मालीम जेटी वयल्यान नुस्त्याची विक्री करता.
दुबावितांनी ताचे कडल्यान उडुपी व्हरपा खातीर वयल्या काळांत नुस्त्याची खरेदी केली. पूण ताचे बदलांत 1 कोटी 24 लाख 48 हजार रुपया खरेदीची रक्कम दिली ना.
तशेंच दोगूय दुबावीत फेब्रुवारी सावन बेपत्ता आसात. ते खंयच मेळनात. निमाणें आपूण फटवलो हाची कल्पना येतकूच कागाळदारान पुलिशेंत धांव घेवन कागाळ दाखल केली.
ह्या प्रकरणांत फुडलो तपास पुलीस निरिक्षक अनंत गांवकार हांच्या मार्गदर्शना खाला उपनिरिक्षक सीताराम मळीक करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
