भांगरभूंय | प्रतिनिधी
गोविंद शिरोडकारः जिल्हो निबंधका कडेन प्रकाश वेळीप हांचे आड याचिका
पणजीः प्रकाश वेळीप आनी गोविंद गावडे हांणी उटा संघटणेचो आपल्या स्वताच्या फायद्या खातीर वापर केलो. संघटणेचे घटने प्रमाण दोन वर्सां परस चड तेंप अध्यक्षपदार रावपाक मेळना. पूण प्रकाश वेळीप हे सेगीत सात वर्सां अध्यक्षपदार राविल्ल्यान तांचे आड जिल्हो निबंधका कडेन याचिका दाखल करून समिती रद्द करपाची मागणी केल्या अशें गाकुवेधाचे अध्यक्ष गोविंद शिरोडकार हांणी सांगलें.
2003 वर्सा आमकां दर्जो मेळ्ळो, पूण घटनेचे अधिकार आमकां मेळूंक नाशिल्ल्यान आठ आदिवासी संघटणांनी मेळून उटा संघटणेची स्थापणूक केली अशें शिरोडकार हांणी सांगलें.
गाकुवेध, अखील गोंय अनुसुचीत जमात संघ, आदिवासी कल्याण संस्था, गोंय गौड जमात महासंघ, ताळगांव आदिवासी कल्याण संघ, गोमंतक गौड मराठा समाज, ट्रायब्स ऑफ गोवा आनी गोमंतक वेळीप समास संघ हांची युती म्हळ्यार उटा. डॉ. काशिनाथ जल्मी, बाबुसो गांवकार आनी आंतोन गांवकार ह्या उटाच्या संस्थापकांनी गोंयभर ताचें नांव केलें. पूण 2007 उपरांत उटाक राजकी खुंटयाळ्याक बांदली असो आरोप शिरोडकार हांणी केलो.
जेन्ना उटा कसलोय निर्णय घेता तेन्ना आमकां केन्नाच विश्वासांत घेना. फक्त प्रकाश वेळीप आनी गोविंद गावडे हांकां जाय तेन्ना उटाक जाग येता. वेळीप आनी गावडे हे दोगूय उटाक स्वताचें बेंस समजतात. तांणी केन्नाच आंदोलन करूंक ना. फक्त सरकारा कडल्यान पदां घेतल्यात. उटाची म्हयन्याळी बसका तशेंच आमसभा आनी खाशेल्यो सभा लेगीत जावंक ना असोय आरोप शिरोडकार हांणी केलो.
गोविंद गावडे हांणी आदिवासी समुदायाचे विशय केन्नाच विधानसभेंत मांडूंक नात. जेन्ना जेन्ना गावडे हांचेर संकश्टां येतात तेन्ना उटाक नेट येता. उटा फक्त गावडे हांकां साल्वार करपाक आसा. गोविंद गावडे हे उटाच्या आंदोलनांत केन्नाच वांटेकार नासले. चुकीचो इतिहास लोकां मुखार दवरला. खऱ्या संस्थापकांक कुशीक काडून 2007 उपरांत गावडे हांचें नांव संस्थापक म्हूण वळेरेंत घालां असो दावो शिरोडकार हांणी केलो.
उटाचे घटने प्रमाण अध्यक्ष वेंचून येतकच तांकां दोन वर्सांच्या कार्यकाळा परस चड तेंप अध्यक्षपदार रावंक मेळना. प्रकाश वेळीप हे सेगीत सात वर्सां अध्यक्ष आसात आनी हाचे पयलीं गावडे सेगीत पांच वर्सां अध्यक्ष आसले. हें कायद्याचें उल्लंघन आसा. देखून आमी प्रकाश वेळीप हांचे आड मडगांवां जिल्हो निबंधका कडेन याचिका दाखल करून ही समिती रद्द करून प्रशासक नेमपाची मागणी केल्या अशी म्हायती शिरोडकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
