भांगरभूंय | प्रतिनिधी
पेडणेः पेडणें उजो पालोवपी दळाचे जवान रतन राजाराम परब (39) हांची कूड 2 ऑगस्टाक सकाळीं पोरस्कड्यां रेल्वे पुलाचेर सांपडली. रेल्वे रुळाचेर कुडीचे कुडके पडिल्ले.
हे संबंदांतली म्हायती रेल्वे कर्मचाऱ्यांनी आपल्या कार्यालयाक दिले उपरांत ताची कूड रेल्वे पुलिसांनी ताब्यांत घेवन पोस्टमॉर्टमा खातीर गोमॅकाँत धाडली.
शुक्रारा सांजे वेळार कामाक वता अशें सांगून रतन घरांतल्यान भायर सरिल्ल्याची म्हायती मेळ्ळ्या. मात ताची ड्युटी शेनवारा सकाळीं आशिल्ली, अशी म्हायती पेडणें उजो पालोवपी दळाच्या कर्मचाऱ्यांनी दिली. रतन राती पोरस्कड्या आयले आनी तांणी आपली दुचाकी पोरस्कड्यां पुला पोंदा दवरली. ती सकाळीं मेळ्ळी. तो रेल्वे रुळाचेर कित्याक गेल्लो? ताका थंय कोणे आपयिल्लो? ताणें आत्महत्त्या केली काय ताची कोणे हत्त्या केली, अशी आरथी परथी चर्चा गांवांत सुरू आसा. ताच्या फाटल्यान घरकान्न, आवय तशेंच दोन ल्हान भुरगीं असो परिवार आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
