भांगरभूंय | प्रतिनिधी
मडगांव : कोणाक कितलीं एलडी पदां वाटलीं आनी कोणाच्यो मागण्यो न्हयकारल्यो? सात पदांचे मागणेचें कुवाडें कितें? मिशन टोटल कमिशनाचे भागीदार कोण आसात, ह्या सगळ्या प्रस्नांच्यो जापो मेळपा खातीर उच्च न्यायालयाच्या निवृत्त न्यायमूर्तीं कडल्यान भरती प्रक्रियेची चवकशी जावची, अशी मागणी कॉंग्रेस अध्यक्ष अमित पाटकार हांणी केली.
सध्याच्या भ्रष्ट भाजप सरकाराक सत्तेर रावपाचो अधिकार ना. संद मेळटा काय म्हणून पळयतल्यांक राजकी लाव घेवपाक दिवं नाकात आनी सुशिक्षीत बेरोजगार गोंयच्या तरणाट्यांच्या फुडारा कडेन खेळूं नाकात. स्टाफ सिलेक्शन कमिशना खाला सगळ्यो भरती प्रक्रिया करप हो एकूच मार्ग आसा. एलडीसी पदां रद्द करात, अशी मागणी पाटकार हांणी केली.
एका राजकारण्यान सात एलडीसी पदांची मागणी केल्ली. मात येणावळ मंत्री आंतान्सियो मोन्सेरात हांणी त्या राजकारण्याक न्हयकार दिलो. भाजपच्या एका पदाधिकार्याचे शिफारसी प्रमाण खुबश्या जाणांची निवड जाल्या, अशें मुखार आयलां. ह्या सगळ्याची चवकशी जावप गरजेचें, अशें तांणी मुखार म्हणलें.
बाबुश मोन्सेरात हे नोकर्यांच्या विक्रे विशीं पुरावे मागतात. हें धक्को दिवपी आसा, अशेंय मुखार तांणी म्हणलें. बाकी सगळ्या गजालींचेर कॉंग्रेस लक्ष दवरून आसा. गोंयच्या तरणाट्यांच्या फुडारा कडेन खंयच्याच राजकारण्याक खेळपाक दिवचोंना. वस्तुस्थिती आनी खर्याचे वटेन उबे रावुया. लक्ष भरकटवपा खातीर एकमेकांच्या संगनमतान सुवार्थी राजकारण्यांनी मांडिल्ल्या कपटाक बळी पडचेनात अशें अमित पाटकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
