भांगरभूंय | प्रतिनिधी
2 कोटी 82 लाख 46 हजार 550 रुपयांची फटवणूक
भांगरभूंय । प्रतिनिधी
पणजी: उगें-सांग्यार सरकाराच्या नांवार आशिल्ली सुमार 45,321 चौखण मिटर जमनीची बनावट मालकी आनी हेर दस्तावेज तयार करून सुमार 2 कोटी 82 लाख 46 हजार 550 रुपयांची विक्री करून सरकाराची फटवणूक केल्ल्याचें मुखार आयलां. ह्या प्रकरणांत विशेश तपास पंगडान (एसआयटी) सोशियाद प्राट्योटिका दोस बालडियोस दास नोव्हास कॉन्क्विस्तास सांगें ह्या सोसायटीच्या स वांगड्यां सयत हेरां आड गुन्यांव दाखल करून चवकशी सुरू केल्या.
ह्या प्रकरणांत सांगेंचे मामलेदार राजेश सांखळकार हांणी कागाळ दाखल केल्या. हाची दखल घेवन एसआयटीन गुन्यांव दाखल करून तपास सुरू केला. ते प्रमाण सोशियाद प्राट्योटिका दोस बालडियोस दास नोव्हास कॉन्क्विस्ताव, सोसायटीचे जुझे आल्बुकर्क पिंटो (मडगांव), सेड्रीक झेवियर कार्व्हालो (पणजी), जुझे गौविया पिंटो (पणजी), ज्योकीम मोन्तेरो (लोटली), थॉमस नरोन्हा (पणजी), सिनेझियो आंताव (मडगांव) हांचे सयत हेतुपुरस्सर बनावट दस्तावेज तयार करून सरकाराच्या नांवार आशिल्लो भूंयखंड सोसायटीच्या वांगड्यान आपल्या नांवार करून विकिल्ल्याचें कागाळींत म्हणलां.
हाचे बगर सरकारान संबंदीत भूंयखंड 28 जुलय 1966 दिसा आनी 2 जून 1977 दिसा दोन वेगळ्योवेगळ्यो अधिसुचोवण्यो जारी करून सोसायटीक भाडेतत्वाचेर दिल्ली जमीन परतून घेतिल्ली. उपरांत 4 जून 2021 दिसा संबंदीत जमीन उपजिल्होधिकाऱ्यान आनी सांगें मामलेदारान आदेश जारी करून सोसायटीचें नांव कुशीक काडून सरकाराच्या नांवार केल्ली.
अशें आसून लेगीत वयर दिल्ल्या सोसायटीच्या वांगड्यान संबंदीत भूंयखंडाची सुमार 71 जाणांक विक्री केल्ल्याचें कागाळींत म्हणलां. सांगेंच्या मामलेदारान 14 जुलय 2022 दिसा सांगेंचे नागरी उपनिबंधकाक पत्रवेव्हार करून वयल्या भूंयखंडा विशीं सोसायटीन केल्ली विक्री कबलात पत्रांची म्हायती मागोवन घेतली तेन्ना उगें-सांगें हांगासरल्या सर्वे क्रमांक 1/3, 84/0, 84/1, 34/1 आनी सर्वे क्रमांक 52/0 ह्या भूंंयखंडांतली 45,231 चौखण मिटर जमनीची बनावट मालकी आनी हेर दस्तावेज तयार करून सुमार 2 कोटी 82 लाख 46 हजार 550 रुपयांची विक्री केल्ल्याचें मुखार आयलां.
हातूंत सगल्यांत चड 1,315 चौखण मिटर जाल्यार सगल्यांत उणो 135 चौखण मिटराचो भूंयखंड विकला. हातूंत सगल्यांत चड भूंयखंडाचें मोल 20 लाख रुपया जाल्यार सगल्यांत उण्या भूंयखंडाचें मोल 47,250 रुपयांक विकिल्ल्याचें मुखार आयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
