भांगरभूंय | प्रतिनिधी
पंचायत म्हणटा आपल्याक कांयच खबर ना; कारभाराचेर आडनदर चलिल्ल्याचो आरोप
भांगरभूंय । प्रतिनिधी
सांगें: उगें पंचायत वाठारांत नियोजीत आयआयटी प्रकल्प येता. ताचें सर्व्हेक्षण चल्लां. 144 कलम लावन शेतकारांक शेतांत वचपाक बंदी घालतात. विरोधांत उलयल्यार पुलीस स्टेशनाचेर व्हरतात. तरी लेगीत पंचायत वाठारांत चलिल्ल्या ह्या कारभाराचेर पंचायत आडनदर करता. पंचायत आयआयटी विशीं आपल्याक कांयच खबर ना म्हणटा, ही सामकी लजेची गजाल. आपल्या वाठारांत कितें चलता तें थळाव्या पंचाक वा सरपंचाक खबर ना काय कितें, असो प्रस्न गांवच्या लोकांनी उगें पंचायतीन आयोजीत केल्ले ग्रामसभेंत पंचायत मंडळाक विचारलो.
ह्या वेळार माचयेर सरपंच भारती नायक, उपसरपंच रामा पांढरमिसाळ, पंच मार्कूश पेरेरा, अलविरा फर्नांडीस, दिव्या नायक, विठ्ठल गांवकर, उत्कर्षा देसाय, पंचायत सचीव सुषमा सावंत देसाय आनी गौरेश नायक हजीर आशिल्ले. ग्रामसभेक शंबरा वयर लोक हाजीर राविल्ले. ग्रामसभेक पयलेच फावट पुलीस बंदोबस्त तैनात केल्लो.
उगें पंचायतीन पंचायत सभाघरांत ग्रामसभा आयोजीत केल्ली. ते ग्रामसभेंत खूबशे विशय चर्चेक आयले तातूंतले दोन विशय खूब तापले, ते म्हणल्यार आयआयटी प्रकल्पाचो आनी दुसरो रस्त्या वयल्या लायटींचो.
सांगें मतदारसंघांत येवपी आयआयटीची गजाल आयज पुराय देशांत पातळ्ळ्या. कांय प्रमाणांत विदेशांतूय ताचेर चर्चा चल्ल्या. तरी लेगीत आपल्याच पंचायत वाठारांत येवपी प्रकल्पा विशीं आपल्याक कांयच खबर ना, आमी ते विशीं कांयच आयकूंक ना, सर्व्हेक्षण केलां हें खबर आसून लेगीत हो प्रकल्प उगें पंचायत वाठारांत येता काय मळकर्णे येता अशी चवकशी करपी पंचायत मंडळाचेर लोक फुर्योज जाले.
पंचायतीच्या नेणारपणाचेर बेजार जाल्ले सांतान रॉड्रिगीज हांणी सांगलें, आयआयटी प्रकल्प आमच्याच पंचायत वाठारांत येता. जेन्ना खंयचोय प्रकल्प येता तेन्ना पंचायतीचो ना हरकत दाखलो जाय पडटा, तरीय जमनीचें सर्व्हेक्षण जाता. 144 कलम लावन लोकांक शेतांत वचपाक तशेंच एकठांय येवपाक बंदी घातल्या. जें रोयलां तें गोरवां खातात आनी सरकार सांगता शेतां रोयात. हो कसलो न्याय? एके वटेन सैम सांबाळात असो उलो मारपी सरकार दुसरे वटेन आयआयटी प्रकल्प हाडून सैम पेड्डेर करपाक सोदता. जमनीचें सर्व्हेक्षण करतात तेन्ना लोकांक गरजे भायर त्रास करतात. खरें म्हणल्यार सर्व्हेक्षणा वेळार थळावे पंच विठ्ठल गांवकार हांणी थंय हाजीर रावपाक जाय आशिल्ले. आपल्या प्रभागांत येवपी आयआयटी आडावपाक जाय आशिल्ली. पूण पंचायत मंडळान आपलें तोंड बंद केलां आनी दोळेय धांपल्यात, असो आरोप सांतान रॉड्रिगीज हांणी केलो.
गोंय मुक्त जावन आयज 60 वर्सां जावन गेलीं. तरी लेगीत अजून कांय गांव काळखांत आसात आनी सरकार उदरगतीचे झेत मारता. उगेंच्या प्रभाग नं. 2 त लायट हाडपा खातीर फायल दिल्ली. हे गजालीक 6 वर्सां जालीं, तरीय अजून लायट कित्या खातीर येना, असो प्रस्न टीना कुतिन्हो हांणी प्रस्न विचारलो. सरपंचान ताका जाप दितना सांगलें, हो केंद्र सरकाराचो प्रकल्प. वीज मंत्र्यान हें काम पंचायत फंडांतल्यान करपाक सांगलां, पूण इतली रक्कम पंचायत फंडांतल्यान दिवपाक मेळना.
ह्या विशया वयली चर्चा खुबूच तापली. गांवांत अजून लायट पावना जाल्यार जल्मभर आमी कितें काळखांतूच रावचें, असो प्रस्न कुतिन्हो हांणी केलो.
हे ग्रामसभेंत फिलीप फुर्तादो, माया जांगळी, डायगो मार्टीन, सबेस्तू फर्नांडीस आनी हेर लोकांनी आपले विचार मांडले. सरपंच भारती नायक हांणी येवकार दिलो जाल्यार दिव्या नायक हांणी उपकार मानले.
आयआयटी संबंदांत परतून ग्रामसभाः सरपंच
उगें पंचायतीचे ग्रामसभेंत लोकांनी विचारिल्ल्या एकाय प्रस्नाक पंचायत मंडळाक जाप दिवपाक जाली ना. दर प्रस्नाक मेळपी खंयचे खंय जाप पळोवन लोक खुबळ्ळे. त्या वेळार तांणी गांवांत खंयचेच स्थितींत आयआयटी प्रकल्प येवपाक दिवचे नात, असो निर्णय पंचायत मंडळाक सांगलो. त्या वेळार सरपंच भारती नायक हांणी ह्या विशयाचेर परतून ग्रामसभा आपोवया, अशें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
