भांगरभूंय | प्रतिनिधी
भांगरभूंय । प्रतिनिधी
सांगेंः उगें ग्रामपंचायीच्या आयतारा जाल्ले ग्रामसभेंत आयआयटीक लोकांनी तेंको दिलो, हो सरपंच भारती नायक हिचो दावो फटीचो आसा. ग्रामसभेंत आयआयटी हो विशयूच नास्तना सरपंचान कोणाचो आयआयटीक तेंको आसा तांकां हात वयर करपाक सांगलें. सभाघऱांत तेन्ना हाजीर आशिल्ल्या दोनशें लोकांतल्या फकत 40 जांणानी हात वयर केलो. ज्या 160 जांणानी हात वयर केलो ना ताच्या मताचो विचार करनास्तना आयआयटीक तेंको दिल्लो थाराव पास जालो अशें सांगपी सरपंच भारती नायक हिची फटींगपणा आमी सोसून घेवचे नात अशें उगेचो समाज वावुरपी फिलीप फुर्तादो हांणी सोमाराक उगें हांगा घेतिल्ले पत्रकार परिशदेंत सांगलें. ह्या वेळार मार्कूश परेरा, एलविरा फर्नांडीस हे पंच वांगडी आनी उगेंचे बरेच आयआयटी विरोधक हाजीर आशिल्ले.
ग्रामसभेच्या अजेंडांत आयआयटी हो विशयूच नाशिल्लो. हो थाराव ग्रामसभेंत अकस्मात मांडपाचें हें पयलींच थारायल्लें. ते प्रमाण सरपंच नायक हिणे हात वयर करपाक सांगलें आनी दोनशेंतल्यान फकत 40 लोकांनी हात वयर केल्ले अशें फुर्तादो हांणी सांगलें. भारती नायक हिणे ह्या वेळार व्हिडिओ रिकॉर्डींग करपाक मनाय केल्ली. मात जेन्ना 40 लोक हात वयर करून दाखयतात तेन्ना रिकॉर्डींग कोणे केलें, असो प्रश्न करून पूर्वनियोजन पद्दतीन हीं सगळीं फटींगपणा केल्यांत. आमी ती लोकां सामकार हाडटले अशें तांणी सांगलें.
ग्रामसभे उपरांत सरपंच भारती नायक हीणे आयआयटीक शंबर टक्के लोकांचो तेंको आशिल्ल्याचे सांगून तांणी उगेंतल्या ग्रामस्थांचो विश्वासघात केला आनी ताची फळां तिका भोगचीं पडटलीं अशी शिटकावणी फुर्तादो हांणी दिल्या. उग्यांतल्या लोकांचो आयआयटीक विरोध आसा हे खबर आसून लेगीत पंचायत मंडळाचेर राजकी चेंपण हाडून बळग्यां आयआयटीक समर्थन आशिल्ल्याचो थाराव पास केल्ल्याचें नाटक घडोवन हाडलां असो आरोप तांणी केला.
आयतारा जाल्ले ग्रामसभेंत जें कितें केलें ते विशीं उगें पंचायत वाठारांतले लोक समाधानी नात. आयआयटी नक्की खंय जातली हेंच लोकांक खबर ना. कोटाल्ले जावपाक शकना जाल्यार आयआयटी उग्यांत हाडपाचो विचार चल्ला अशें दिसता. मात आमच्या पंचायत वाठारांत हो प्रकल्प आमच्या लोकांक नाका आनी आपूण तांच्या फाटल्यान आसा अशें पंच वांगडी मार्कूश परेरा हांणी सांगलें.
ग्रासभेच्या अजेंडांत आयआयटी हो विशय घालपाक जाय आशिल्लो. उपरांत तो सभेंत मांडपाक जाय आशिल्लो. म्हाका सरपंच भारती नायकान आयआयटीचेर उलोवनाका अशें सांगलें. आयआयटीक लोकांचो विरोध आसल्यार ती हाडून शेतां भाटां कित्याक ना नपयत करपाक जाय, असो प्रश्न पंच वांगडी एलविरा फर्नांडीस हिणे करून आपलो सांग्यार आयआयटी हाडपाक सदांच विरोध आसतलो अशें सांगलें.
अजेंडाचेर आयआयटीचो विशय नाशिल्ल्यान ग्रासभेंत तो घेवपाक मेळना अशें सरपंच भारती नायक हिणे सांगल्लें. मागीर अकस्मात तिणे हो विशय कसो घेतलो, आयआयटी म्हणल्यार किंदें हें तिका खबर ना, काय उगेंतल्या लोकांचो आयआयटीक तेंको आसा हें दाखोवन दिवपा खातीर तिणे थारावाचें नाटक केलें अशें मिल्टन गोम्स हांणी विचारलां. सरपंच आनी तिगेल्या राजकी गुरूक जाय तसो निर्णय घेवपाक मेळचो ना अशें तांणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
