भांगरभूंय | प्रतिनिधी
ऑस्ट्रेलियेचो पंगड फुडल्या म्हयन्यांत भारताचे भोंवडेर येतलो. दोनूय पंगडां मदीं चार टॅस्टींची आनी तीन वन डे मॅचींची माळ जातली. ऑस्ट्रेलियेचे हे भोंवडे वयल्या पयल्या दोन टॅस्टीं खातीर भारतान आपल्या पंगडाची घोशणा केली.
पंगडाचें फुडारपण रोहित शर्मा करतलो जाल्यार लोकेश राहुल उप मुखेली आसतलो. दुखापतीक लागून फाटल्या कांय म्हयन्यां सावन पंगडांतल्यान भायर आशिल्ल्या रवींद्र जडेजाची निवड केल्या. पूण, ताचे तंदुरुस्तीचेर निमाणो निर्णय जातलो. टी-20 प्रकारांत जबरदस्त बॅटींग करपी सुर्यकुमार यादवाची टॅस्ट पंगडांत निवड केल्या.
विकेटकीपर म्हणून ईशान किशन आनी केएस भरत हांची निवड केल्या. फाटल्या म्हयन्यांत मोटार अपघातांत जखमी जाल्लो ऋषभ पंत फुडले कांय म्हयने निवडी खातीर उपलब्ध आसचो ना. स्पिनरां मदीं आर आश्विन, अक्षर पटेल आनी कुलदीप यादव हांची निवड केल्या, जाल्यार फास्ट बॉलिंगेचो विभाग मोहम्मद शमी, मोहम्मद सिराज, उमेश यादव आनी जयदेव उनाडकट सांबाळटले.
मजगतीं, न्युझिलॅण्डा आड जावपी टी-20 आनी वन डे माळे खातीर बीसीसीआयन शुक्रारा घोशणा केल्ली. देशांतर्गत क्रिकेटींत धांवड्यांचो पावस घालपी पृथ्वी शॉक टी-20त अखेरेक सुवात मेळ्ळी. जाल्यार रोहित शर्मा आनी विराट कोहली हांकां टी-20 पंगडांत सुवात दिवंक ना. जसप्रीत बुमराचो खंयच्याच पंगडांत आस्पाव करूंक ना. हार्दिक पांड्या टी-20 पंगडाचें फुडारपण करतलो. सुर्याकुमार यादव उप मुखेली आसतलो. अक्षर पटेल आनी लोकेश राहुल वन डे माळेंत खेळचे नात.
न्युझिलॅण्डा आडचे वन डे माळे खातीर पंगडः रोहित शर्मा (मुखेली), शुभमन गिल, ईशान किशन, विराट कोहली, श्रेयस अय्यर, सुर्यकुमार यादव, केएस भरत (विकेटकीपर), हार्दिक पांड्या, वॉशिंग्टन सुंदर, शाहबाज अहमद, शार्दुल ठाकूर, युजवेंद्र चहल, कुलदीप यादव, मोहम्मद शमी, मोहम्मद सिराज आनी उमरान मलिक.
न्युझिलॅण्डा आडचे टी-20 माळे खातीर पंगडः हार्दिक पांड्या (मुखेली), सुर्यकुमार यादव, ईशान किशन, ऋतुराज गायकवाड, शुभमन गिल, दीपक हुड्डा, राहुल त्रिपाठी, जितेश शर्मा (विकेटकीपर), वॉशिंग्टन सुंदर, कुलदीप यादव, युजवेंद्र चहल, अर्शदीप सिंग, उमरान मलिक, शिवम मावी, पृथ्वी शॉ, मुकेश कुमार.
ऑस्ट्रेलिये आडच्या दोन टॅस्टीं खातीर पंगडः रोहित शर्मा (मुखेली), लोकेश राहुल, शुभमन गिल, चेतेश्वर पुजारा, विराट कोहली, श्रेयस अय्यर, केएस भरत, ईशान किशन, आर आश्विन, अक्षर पटेल, कुलदीप यादव, रवींद्र जडेजा, मोहम्मद शमी, मोहम्मद सिराज, उमेश यादव, जयदेव उनाडकट आनी सुर्यकुमार यादव.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
