इलें, इमान इलें

भांगरभूंय | प्रतिनिधी

अखेरेक गोंयच्या नव्या मोपा विमानतळाचेर व्हडलें विमान देंवोवपाची चांचणी यशस्वी जाली. गोंयकार खास करून पेडणेंकारां खातीर ही खोशेची गजाल. सिग्नल, धांवपट्टी आनी हेर सगल्या तांत्रीक गजालींची चांचणी काल जाली. आतां विमानतळाच्या सगल्या कामांचेर निमणो हात भोंवतलो. मागीर तो सगल्या तरांच्या विमानां खातीर उक्तो जातलो. तशें हेर राज्यां मदीं उदरगतीचे बाबतींत गोंय मुखार आसा. तरीय कांय तालुक्यांचो म्हणपाक जाय तितलो विकास जावंक ना. दर्यादेगे वयले तालुके सोडल्यार शिमे वयले म्हाल फाटीं उरल्यात. दोनूय तोंका वयले पेडणें आनी काणकोण तालुके हेरां परस चडूच फाटल्यान आसात. हांगा राष्ट्रीय पांवड्यांचेर नांव जाल्ले साबार गोंयकार जल्मल्यात. पूण, कांय कारणांक लागून गोंय मुक्ती उपरांत बरोच काळ हे दोनूय तालुके हेरांचे तुळेन मागास उरले. पेडणें तालुक्याक आतां बरे दीस येतले. मात, ही उदरगत नियोजनबद्द पद्दतीन जावंक जाय. नाजाल्यार 10-12 वर्सांनी पेडणेंकार 25 आनी भायले 75 अशी लोकसंख्येची असंतुलीत वाड जावं येता!
मोपा विमानतळ हो दाबोळे परस व्हडलो आसतलो. थंय दिसाक देडश्यां वयर विमानां देंवतलीं. ताचेच वांगडा दाबोळेय चालू उरतलो, अशें आस्वासन सरकारान दिलां. ह्या विमानांनी येवपी प्रवाशांची (पर्यटक) सरबराय करपाक आमकां राज्यांत अत्याधुनिक सुविधा उबारच्यो पडटल्यो. उदरगतीचोच तो वांटो. स पदरी रस्तो जाला, पूण तो चकचकीत जावंक जाय. मोपाक लागून पर्यटक येतले, तांची रावपा- जेवपाची, गोंय पळोवपाची तजवीज सोंपेंपणी जावंक फावो. उदक, लायट, कोयर हे प्रस्नूय आसात. राष्ट्रीय, आंतरराष्ट्रीय पांवड्या वयल्यो कार्यावळी, परिशदो, बसका गोंयांत जातल्यो. सरकाराक, सरबराय मळा वयल्या उद्देजकांक तें मतींत घेवन नेटान वावराक लागचें पडटलें. टॅक्सी वेवसायाक बरे दीस येतले. मात, हे विशीं सद्यां चल्ला तो वाद सोंपोवंक जाय. दाबोळेच्या टॅक्सीकारांचो मोपाक विरोध आशिल्लो. टॅक्सी वा हेर वेवसायांत अर्थांत पेडणेंतल्या वेवसायिकांक प्राधान्य मेळटलें, पूण राज्यांतल्या सगल्या बेरोजगारांक थंय संद मेळची. गोंयकारांक जमचें ना, अशें शिता पयलीं मीठ खावन मोपा वयल्या सेवांचें आवटसोर्सिंग करचें न्हय. एकल्या वेवसायिकाक जमचें ना, अशी खात्री जाल्यार तो काॅण्ट्रेक्ट गोंयचे एखादे कंपनीक दिवचो. कितेंय करपाचें जाल्यार गोंयकारांक प्राधान्य मेळपाक जाय. पयलीं भुमीपुत्र, मागीर हेर, हो नेमूच केल्यार बरो. गोंयकारांनीय मेळटा ती नोकरी, वेवसाय करपाची तयारी दवरूंक जाय. आमी जें सोडलें, तें भायल्यांनी वेंगायलें आनी खिणाभितर ते आमच्या फुडें गेले, हें विसरपाक फावना. नोयडा, वेर्णा, ओरोस हे गांव अचकीत सुदारले, तशी मोपा आनी सरभोंवतणच्या वाठारांची सुदारणा जावची.
मोपा खातीर जांच्यो जमनी गेल्यात, तांकां बाजारभावान भरपाय मेळपाक जाय. बऱ्याच जाणांक ती मेळूंक ना, अशें आयकूंक येता. कांय जमनींक नवे धनी मेळ्ळ्यात. आनीकूय जमनींक नवे मालक मेळटले. जमनींक मोल येतलें. मात, पयसो मेळटा म्हूण सरसकट जमनी विकप योग्य थारचें ना. सिंधुदुर्ग जिल्ह्यांत सध्या होच प्रकार सुरू आसा. जमनी भायल्यांक विकचे परस काजू, आंबे आनी हेर बागायती पीक घेयात, भाजी रोंयात, अशे भावनीक आवाहन करपी पोस्ट सोशल मिडियाचेर अदीं मदीं दिसतात. खावपाचे जिनस, हेर वस्तू तयार करपी घरगुती उद्देग, स्टाॅल थळाव्यांनी चलोवं येता. मात, विमानांनी येवपी आनी बशींनी येवपी पर्यटक, प्रवाशी हांचे मदीं फरक आसता, हें विसरून उपकारचें ना. तरीय सरकारान मनार घेतल्यार मोपा बऱ्याच गोंयकारांक सहज पोटाक लावं शकता.
मोपाचो फायदो शेजराच्या सिंधुदुर्गाकूय जातलो. जावं. थंय चिपी जाला. तो सध्या तरी खाजगी ल्हान विमानां खातीर अशें म्हणटात. आमचो मोपा मात सगल्या अर्थान व्हडलो विमानतळ. गोंयच्या मुकुटार खोंयिल्लो मानाचो तुरो कसो. 15 आॅगस्ट वा 30 सप्टेंबर मेरेन ताचें उक्तावण जातलें, अशी घोशणा जाल्ली. पूण ताकतिक करीनासतना सगलीं कामां योग्य पद्दतीन निटायेर घालून येते 26 जानेवारीक ताचें उक्तावण केल्यार बरें. ‘इलें, इमान इलें’ म्हणीत काल पेडणें म्हालांतले ल्हान भुरगे नाचल्या आसतले, तांची ही खोस सांसणाची उरूं.