भांगरभूंय | प्रतिनिधी
महसा अमिनी (22) ही चली पुलीस बंदखणींत संवसाराक अंतरली ताका आतां 17 दीस जावन गेले, तरीय तिच्या मरणाचो निशेध इराणांत चालू आसा. हिंसाचार चालूच आसा. आतां मेरेन सुरक्षा रक्षकां सयत 41 जाणांक मरण आयलां. (मनीस हक्क संघटनेच्या मतान 76) तर 1200 लोकांक अटक जाल्या. महसा हें तेहरानांत आयिल्लें. हिजाब घालूंक नाशिल्ल्यान नैतिक वा संस्कृती रक्षक पुलिसांनी (धर्मिक, संस्कृतीक बंधना कोण पाळटात काय नात, तें पळोवपी.) तिका ताब्यांत घेतलें. इराणांत खंयच्याय धर्माचे बायलेन पावल दवरलें जाल्यार तिका हिजाब, ओढणी, पदर तकले वयल्यान घेवचोच पडटा. तसो कायदो आसा. (हिजाब घालचोच पडटलो असो हट्ट इराणी अधिकाऱ्यांनी धरिल्ल्यान सीएनएनाची पत्रकार ख्रिश्चियान अमनपोर हिणें इराणाचे अध्यक्ष इब्राहीम रैसी हांची मुलाखत घेवपाक हालींच न्हयकार दिला.) पुलीस म्हणटात, महसाक व्हरतना काळजाच्या आताकान मरण आयलें. तर घरचे म्हणटात, पुलिसांनी मारपेट केल्ल्यान तें गेलें. तीन दीस कोमांत उरले उपरांत महसाक मरण आयलें. उपरांत इराणांत तें सुरू आसा, तें अजून सोंपूंकना. शेंकड्यांनी बायलांनी आंदोलनाच्या जाहीर सभांनी लोकां सामकार हिजाब काडून लासले, केंस कापून बाॅबकट केलो. सरकारी मालमत्तेक उजो लायलो. हो हिंसाचार आतां तेंगशेर पावला. पुराय देशाकूय उजो पेटला म्हणल्यार जाता. आतां अध्यक्ष रैसी हांणी शिटकावणी दिल्या, समाजांतली शांतीकाय आमी इबाडपाक दिवचे नात. मात, तेवटेन
लोक आयकुपाक तयार नात. हेर देशांनी अजून थंय फावो तितलें लक्ष घालूंक ना. कडवीं मुस्लीम राष्ट्रांय ओगी आसात.
इराणांतले हे पुलीस म्हणल्यार गश्त ए अर्शाद. धर्म, संस्कृतायेचे जे नेम आसात, ते बायलो पाळटात काय नात, तें पळोवपाचें तांचें काम. सरकारुच तांकां नेमता. हिजाब घातला काय ना, संस्कृतायेकक सोबना तसलें बायलो कितें करता काय हें पळोवपाक ते गस्त घालतात. नेम माड्डिल्यात अशें दिसत जाल्यार हे दादले पुलीस बायलांक सरळ अटक करून व्हरतात. 7-8 वर्सांच्या चली भुरग्याक पसून हिजाब घालचो पडटा. 1979 त इराकांत आयातुल्ला खोमेनी हांचें इस्लामीक सरकार सत्तेर आयलें. लोक दिसान दीस अमेरिकन जायत चल्ल्यात, असो थंयच्या संस्कृती रक्षकांक दिसपाक लागलें आनी तांणी रातयां कडक कायदे केले. इराणांत केस, मानूय धांपची पडटा. हाचे आड बंड करपी जायत्या उच्च शिक्षीत बायलांनी ह्या विशयाचेर पुस्तकां बरयल्यांत. तशें पळयल्यार इराक आनी हेर कडव्या मुस्लीम देशां इतलो इराण कडवो न्हय. पारश्यांचो नवरोज अजून थंयचो राष्ट्रीय उत्सव. कारण पयलीं हो वाठारांत पारशी (पर्शियन) आशिल्लो. अरबांच्या आक्रमणा उपरांत तो मुस्लीम देश जालो. आतां आंदोलन करतात, ते सगले पश्चिमी संस्कृताये कडेन झुकिल्ले, लिबरल असो दावो आंदोलन विरोधक करतात. व्हिडियो व्हायरल जाल्यात तातूंत शर्ट, पॅण्ट घाल्ल्यो बायलोय दिसतात. हिजाबाचे नेम कितेंय आसले तरी ते चलयेक शिटकावणी दिवन सोडूं येतालें. पुलिसांचें म्हणणें खरें धरलें जाल्यार मुखार कितें जातलें, ह्या भंयान ताका आताक आयला आसतलो. पूण तिका जर बडयलां आसत, तर ही वयले वयर सोडून दिवपा सारकी गजाल न्हय. दोशी पुलिसांक कडक ख्यास्त दिवंक जाय. मात खुद्द देशाचे अध्यक्षूच तांचे वटेन आसल्यार ख्यास्त मेळपाची खात्री ना.
आयज संवसार 21 व्या शेंकड्यांत पावला. जग सुदारलां. विज्ञान, तंत्रज्ञानाक लागून एकठांय आयलां. तरीय धर्माच्या नांवान कांय मूठभर लोक हेर लोकांक वेठीक धरतात. आमच्या भारतांतूय केन्ना -केन्ना संस्कृतायेचे राखणदार जागे जातात. आमकां हें मान्य ना, अशें म्हणीत थयथयाट करतात. दुसऱ्यांचो जीव घेवपाक पसून फाटीं फुडें पळयनात. मनशाची जीण पयलींच ल्हान जाल्या. दोन वेळाच्या जेवणाक तो पादिसेर जाला. ताका
सगल्या गजालीं परस पोट म्हत्वाचें दिसता, हें कोणे विसरूंक जायना. इराणी बायलो जाग्यो जाल्यात, स्वातंत्र्याच्यो घोशणा दित तांणी आंदोलन सुरू
केलां. तातूंत त्यो येशस्वी जातल्यो, हाची कोणाक खात्री ना. पूण म्हणून ह्या रणरागिणींनी अजून मैदान सोडूंक ना. पळोवया.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
