भांगरभूंय | प्रतिनिधी
इराणाच्या परराष्ट्र मंत्रालयाचेर हल्लो, आतां मेरेन 224 जाणांक मरणतेहरानः आयतारा रातीं इराणान इझ्राएलाची राजधानी तेल अवीवचेर बॅलिस्टीक क्षेपणास्त्रान हल्लो केलो.
इझ्राएल आनी इराण हांचे मदलो संघर्श 13 जून उपरांत सेगीत चवथ्या दिसा चालू आसा. इराणाच्या हवाई क्षेत्राचेर पुरायपणान नियंत्रण दवरला असो दावो इझ्राएलान सोमारा केला.
इझ्राएल संरक्षण दळान पत्रकार परिशदेंत सांगलें, आतां अस्तंत इराणा सावन राजधानी तेहरान मेरेन इझ्राएल हवाई दळाचें नियंत्रण आसा.
आयडीएफच्या म्हणण्या प्रमाण, इझ्रायलान 50 परस चड झुजारी विमानांनी इराणाचेर हवाई हल्लो केलो आनी 120 परस चड क्षेपणास्त्रां नश्ट केली. इराणा कडेन आशिल्ल्या क्षेपणास्त्र प्रक्षेपकांतली ही एक तृतीयांश क्षेपणास्त्रां आसात.
आयतारा रातीं इझ्राएलान इराणाच्या परराश्ट्र मंत्रालयाचेर हल्लो केलो. हातूंत शंबरां परस चड लोक जखमी जाले. 14 जून दिसा इझ्राएल सैन्यान इराणी संरक्षण मंत्रालयाचेरूय हल्लो केलो.
इराणाच्या हल्ल्यांत आयज 8 इझ्राएल लोकांक मरण आयलें आतां मेरेन इराणांतल्या इझ्राएलाच्या हल्ल्यांत 224 जाणांक मरण आयलां, जाल्यार 1,277 परस चड जखमी जाल्यात. अमेरिकेंतल्या मानवी हक्क कार्यकर्त्यांनी इराणांत 406 जाणांक मरण आयिल्ल्याचो दावो केला.
इराणूय सातत्यान प्रतिकार करपाक लागला. सोमारा सकाळीं इराणी सैन्यान मध्य इझ्राएलांतल्या जायत्या सुवातींनी बॅलिस्टीक क्षेपणास्त्रां उडयलीं. हातूंत 8 जाणांक मरण आयलां, जाल्यार 200 परस चड लोक जखमी जाल्यात.
फाटल्या 4 दिसांत इझ्राएलांत इराणाचो हो सगळ्यांत व्हडलो हल्लो. इराणी हल्ल्यांक लागून आतां मेरेन इझ्राएलांत 24 जाणांक मरण आयलां, जाल्यार 600 परस चड जखमी जाल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
