भांगरभूंय | प्रतिनिधी
कोरगांव, बातमीदार: पेडणें म्हालांतल्या इब्रामपूरच्या सांतेरी देवीच्या जात्रा उत्सवा निमतान चलपी बेकायदेशीर जुगार खेळपा संबंदी राजाराम विष्णु गांवस आनी हेर चवदा जाणांनी राज्यांतल्या पुलीस महासंचालका सयत मोपा पुलीस स्टेशन, उत्तर गोंय पुलीस अधीक्षक, पेडणें उपअधीक्षक आनी गुन्यांव फांट्याक लेखी निवेदन सादर केलें. ह्या निवेदनां इब्रामपूर हांगच्या सांतेरी देवीचे जात्रेक चलपी जुगाराक खर विरोध केला. ताका लागून पुलिसांचे भुमिके कडेन लोकांचें लक्ष आसा.
ह्या निवेदनाचेर कागाळदार राजाराम विष्णू गांवस हांचे वांगडा गंगाराम गांवस, गोपाळ मठकार, विकास गांवस, रामचंद्र गांवस, संतोष एच. धाऊस्कार, सुधीर धाऊस्कार, अर्जुन धाऊस्कार, कृष्णा गांवस, महादेव गांवस, कृष्णा धाऊस्कार, नागेश गांवस आनी मच्छिंद्रनाथ गांवस हांच्या सयो आसात.
पुलीस स्टेशनाचेर दाखल केल्ले लेखी कागाळींत राजाराम विष्णु गांवस आनी हेरांनी म्हणलां की, सकयल सय करपी म्हाजन आनी इब्रामपूर गांवांतले ग्रामस्थ तुमकां कळयतात की आमच्या गांवांत दर वर्सा सांतेरी देवीचो जत्रोत्सव मनयतात. जात्रे निमतान विवीध गांवचे लोक सांतेरी देवीचो आशीर्वाद घेवपा खातीर इब्रामपूर येतात. मजगतीं हांगचे जात्रेक कांय लोक रम्मी, तीन पत्ती, अंदर बाहर अश्या जायत्या पत्त्यांच्या जुगारात बेकायदेशीरपणान गुंथिल्ले आसतात. जुगार खेळप म्हळ्यार कायदो मोडप. पूण तरी लेगीत लोक जात्रांनी जुगार खेळटात. जुगार खेळपाच्या वेळार गांवांत बेकायदेशीर वावरूय जाता. जाका लागून जायत्या जाणांक त्रास जातात. जायते लोक फकत देवीचो आशीर्वाद घेवपा खातीर जात्रेक येतात. पूण बेकायदेशीर जुगाराक लागून लोकांक त्रास जाता. देखून लोक बेगीन भायर सरतात. हाकाच लागून सांतेरी देवी जात्रा उत्सवाच्या निमतान आमच्या गांवांत बेकायदेशीर जुगार खेळपाक आमी खर विरोध करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
