भांगरभूंय | प्रतिनिधी
इब्रामपूर दत्तक गांव प्रस्नाचेर मुख्यमंत्र्यांचें स्पश्टीकरण
भांगरभूंय I प्रतिनिधी
पणजी : केंद्र सरकाराच्या सांसद आदर्श ग्राम येवजणेंत केंद्रीय मंत्री श्रीपाद नायक हांणी दत्तक घेतिल्ल्या इब्रामपूरांतल्या कोमुनिदादीचो प्रस्न बेगिनूच सोडयतले, अशी हमी मुख्यमंत्री डॉ. प्रमोद सावंत हांणी बुधवारा आमच्या प्रतिनिधी कडेन उलयतना दिली.
दत्तक गांव आसतनाय कोमुनिदाद समिती कडल्यान उदरगतीच्या प्रकल्पां खातीर गरजेची जमीन वा हरकत ना दाखलो (एनओसी) दिनात. ताका लागून जायते उदरगतीचे प्रकल्प आडखळून उरल्यात. ताचे परिणाम थळाव्यांक भोगचें पडटात, असो आरोप थळाव्यांनी आमच्या प्रतिनिधी कडेन उलयतना केल्लो.
गांव दत्तक घेवपी मंत्री श्रीपाद नायक हांणीय कोमुनिदाद समिती कडल्यान ‘एनओसी’ मेळनाशिल्ल्यान 25 टक्के प्रकल्पांचें काम आडखळिल्ल्याचो दावो केल्लो. होच विशय बुधवारा मुख्यमंत्री डॉ. प्रमोद सावंत हांचे मेरेन पावयलो, तेन्ना तांणी थंयच्या कोमुनिदाद प्रस्नाचेर बेगिनूच योग्य उपाय काडटले, अशें सांगलें.
कोमुनिदादीन जायत्या प्रकल्पांत आपणाक सहकार्य करूंक नाशिल्ल्याचे म्हणलें. शौचालय बांदतना तांचे कडल्यान ‘एनओसी’ मेळनाशिल्ली. ताका लागून आपूण हो विशय विधानसभेंत मांडून शौचालयां खातीर ‘एनओसी’ची गरज नाशिल्ल्याचो कायदो संमत करून घेतिल्लो, अशें आजगांवकार हांणी सांगलें.
सरकारान कायदो करप गरजेचेंः अाजगांवकार
उदरगतीच्या प्रकल्पां खातीर कोमुनिदाद समितींनी जमनीची ‘एनओसी’ दिवपाक जाय, अशें पद्दतीचो कायदो राज्य सरकारान संमत केल्यार कोमुनिदादीचो प्रस्न निश्चीत निकालांत येतलो, अशें पेडणेंचे आदले आमदार तशेंच आदले उपमुख्यमंत्री मनाेहर आजगांवकार हांणी म्हणलें. हे विशीं आपूण मुख्यमंत्री डॉ. प्रमोद सावंत आनी केंद्रीय मंत्री श्रीपाद नायक हांचे कडेन चर्चा करतलो, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
