भांगरभूंय | प्रतिनिधी
वर्साचे 10 म्हयने सोंपले. 11 वो नोव्हेंबर येतना फाटल्या सप्तकांत आडवेळार आयिल्लो पावस यादींत उरतलो. नोव्हेंबर म्हयनो इफ्फीचो – गोंयांत जावपी भारताच्या आंतरराश्ट्रीय सिनेमा उत्सवाचो. 2004 वर्सा गोंयांतल्या पयल्या इफ्फीपासत स म्हयने आदीं मांडावळीक आरंभ जालो. आयज वयलेचाराक दिसना पूण बसका सुरू जाल्यात, तयारेक नेट आयला. प्रसिद्धी पॅरीस ते गोंय मेरेन. सिनेमाघरां (थेटरां) सिनेमा ही इफ्फीची ज्येश्ठनीत.
थेटरांतलो सिनेमा मोबायलार व्हरपा पासत 21 वर्सां पयलीं गोंयांतल्यान भासाभास जावपाक लागली. ओटीटी माची मार्गाक लागल्या, संवसारीक सिनेमाचें भारतांत शुटिंग जाता. दोन तीन राष्ट्रांच्या कबलातींतल्यान भारतीय सिनेमाची निर्मणी जावपाक लागल्या. इफ्फींत आयिल्ले सिनेमा पयलीं, उपरांत टी व्ही चेर घरा, कचेरेंत, येरादारी करतना पळोवपाक मेळटात. मनरिजवण मळ हाताभायर गाडयेनी वता तेन्ना तांचेर नियंत्रणां येतात. 2025 चे इफ्फींत भासाभाशेचो तो विशय आसतलो, त्याभायर आर्टिफिशल इंटेलिजन्सान कालचो ल्हान सिनेमा व्हड करपाची, व्हडलो सान करपाची मोख केंद्रीय म्हायती आनी प्रसारण मंत्रालयान दवल्ल्या. मंत्रालय तरणाट्यांक सिने चळवळींत हाडपाक, तांचे कुशळटायेक उर्बा दिवपा पासत येवजणी ज्येश्ठांच्या पालवान घडयता.
आतांचे ज्येश्ठ कालचे तरणाटे, आपलें भुरगेपण, आपलीं भुरगीं, घराबो, सुटके झुजांतल्यान संवसारीक सिनेमा बांदपाक पावले. संवसार जेन्ना भारताक आयज महासत्ता म्हणून पळयता तेन्ना भारतीय महासत्तेची वळख इफ्फींतल्या सिनेमांतल्यान किद्याक नासतली?
1952 वर्सा जाल्ल्या उक्तावणांतल्यान इफ्फी गोंयांत 22 वो वाडदीस मनयतना 9 दिसांचो जाला. सात दीस सिनेमा देशी, विदेशी, 10 मिनटां ते दोन अडेज वरां लांबायेचे. नवो सिनेमा जल्माक कसो येतलो? तरनाट्यांक सिनेमाघरांनी, सिनेमा वेवसायांत कशे हाडप? सिनेमाची पायरसी जाता? भारतांतल्या कांय राज्यांतली सिनेमाची चळवळच सोंपूंक पावल्या? खासदार कमल हसन एक दुजे के लिए स्टार ते राजकारणी कसो जालो? दक्षिण भारतांतलेच न्ही देशांतले खेळगडे, सिने कलाकारांक राजकारण कित्याक भावता? त्यो जापो सोदपाचे यत्न इफ्फींत जातलें.
वर्सभर इफ्फी देशांत भोंवता त्या त्या राज्यांतल्या आंतरराष्ट्रीय सिनेमा उत्सवांतल्यान. भोंवतना नवें सोदता, नवनिर्मणेक फुडें व्हरता हें विसरचें न्हय. इफ्फींत बॉलीवूडा बराबरीन (हिंदी) भारतांतल्या हेर भाशेंतलो सिनेमा टी व्ही वेल्यान घराघरांनी पावला. गोंयांतल्या पयल्या इफ्फींतल्यान ती येवजण जाली, चालीक लागली. इफ्फींत डिजिटल सिनेमा, मोबायल सिनेमा, चाय पे चर्चेंतलो सिनेमा, सिनेमांतलें अध्यात्म, मनीसपण, नवे विचार, सिनेमाघरांतल्या व्हडल्या पड्ड्यार, पांच सात नखेत्री हॉटेलांतल्या ल्हान पड्ड्यार (स्क्रिन) अंदूंय आसतलो.
इफ्फी गोंयांत हाडपाक, इफ्फीक शाबासकी दितना इफ्फीच्या पड्ड्याचेर दिसपी मोर पितारपी दिग्दर्शक, निर्माते शाहजी करुण इफ्फींत दिसचे ना. इफ्फींतले अजरंवर मोर, सिनेमा तांच्यो यादी सांगतले. केरळ फिल्मोत्सवावरी गोंयच्या इफ्फीक नामना मेळची, इफ्फींत गोंयचें दायज दिसचें, इफ्फींतल्यान देशी सिनेमा विदेसांत पावचो म्हणून ते वावुरिल्ले. शाहजी साद्या भेसांतल्यान इफ्फींतल्या सिनेमोग्यांमदीं भोंवले. महोत्सव प्रतिनिधीचीं गाराणी आयकून इफ्फी सुदारपा पासत केल्ल्यो तांच्यो सुचोवण्यो भोव मोलादीक थारल्यात. इफ्फी परस भारतीय सिनेमाचें, सिनेथळांचें अर्थकारण उंचेल्या पावंड्यार पाविल्ल्यान अमेरिकेचे अध्यक्ष हॉलीवूड सिनेमाक दरवाडीच्या चपक्यांत हाडटात. हॉलीवूड सिनेमा बेगीन भारतीयांक दिसचो म्हणून इफ्फींत केल्ले यत्न फळादीक जाल्यात. सिनेमाघरांतल्यान ओ टी टी – (ओव्हर द टॉप) सेवा इंटरनेटावयल्यान मोबायलार पावल्यात. सिनेमा, व्हिडिओ, नाटकां, टी व्ही सिरियल्स, खबरांचो तातूंत आसपाव जाता. सिनेमा विचारांचे साखळेंतल्यान बांदतना इतिहास, सत वेगळेतरेन मांडपाचें आव्हान तरणाटे करतात. सगल्यांक जैत मेळटा अशें ना, जैता मेरेन पावतना अपेसय येता. दुखाच्या ल्हारांतल्यान अपेस दाखोवप, अपेसाक सकारात्मकतेची जोड दिवप, मूळ संकल्पना कुशीक दवरुन नवनिर्मणी, पुनर्निर्मणेत वचप सिनेमांतल्यान दिसतलें.
सोयऱ्या इफ्फीक घर न दिवप बरें, सिनेनिर्मणेचे शिक्षण म्हाविद्यालयांत मेळपाची तजवीज जावची. सिनेमाचीं रिळांय इतिहासांत वतलीं, व्हिडिओ, कॅपसुलांतलो ल्हारा ल्हारांतल्यान सिनेमा हातार बांदिल्लें घड्याळ दाखयतलें. सिनमांतल्या ज्येश्ठांच्या यादींक कला अकादमी नाटकघर वाचा फोडटा, ज्येश्ठ तरनाट्यांक मार्गदर्शन करतना याद जाता ज्योती व्यंकटेश हांचेवरी ज्येश्ठ सिने पत्रकारांची. ज्येश्ठ सिने पत्रकार सिनेमा उत्सवांत हाजीरी लायतना सिनेमाची काणीय बरयतात. ते काणयेचें डिजीटल पुस्तक येतलें, मोर नाचतले.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
