भांगरभूंय | प्रतिनिधी
भारताचो आंतरराष्ट्रीय चित्रपट महोत्सव 2004 वर्सा गोंयांत येतना राजपाटण पणजेंतय बदल जाले. दोन दसकां आदीं भारतांतले सिनेमा संस्कृतायेचीं मुळां घट आशिल्ल्या राज्यांनी इफ्फी भोंवडायताले. दिल्ली, कोलकाता, केरळा वरी राज्यांतल्यान इफ्फी गोंयां मेरेन हाडपी आदले मुख्यमंत्री मनोहर पर्रीकार आमचे मदीं नासले, तांणी लायिल्लो इफ्फीचो रोंपो व्हड जाला, भारताचो इफ्फी गोंयांतच दोन दसकां रावला. फुडारांतय इफ्फी गोंयांत रावतलो जाल्यार इफ्फीक धाकटेंशें घर, फिल्म सिटी खातीर नेटान वावराक लागपाक जाय. इफ्फीक घर मेळटलेंच हें वेगळें सांगपाची गरज ना. ते परस वर्साक गोंयच्या एका तरी तरणाट्या दिग्दर्शकाचो, निर्मात्याचो सिनेमा इफ्फींतल्या भारतीय पॅनोरमात दिसता ही व्हडविकाय मुख्यमंत्री इफ्फीच्या उक्तावणांत सांगची. पणजे, मडगांवां, पर्वरेंतल्यान सांकवाळे, सांखळे, काणकोण रवींद्र भवनांतल्यान लोकां मेरेन तो पावोवपाक जाय. सिनेमा परस इफ्फींतले मास्टर क्लास, तंत्रज्ञान गांवगिऱ्या वाठारांनी पावोवप म्हत्वाचें.
गोंयांत आयजय गांवगिरें सैमीक वातावरण आसा. दर्यावेळे इतलेंच काणकोण सारक्या मतदारसंघातलो सैमाचो सांगात सिनेमांनी फावो त्या प्रमाणांत दिसूंक ना. देखणी दुराय वरी कोंकणी सिनेमांतल्यान तो सैम दिशिल्लो. फिल्म सिटी काणकोण मतदारसंघांत बांदूंक सोदतना काणकोणच्यो दर्यावेळो, देवळां, झरे, शेतां आनी जैवीक साधनसामग्रीचें मॅपिंग जावपाक जाय. देशांतल्या हेर राज्यांक गोंय इफ्फींतल्यान नामना मेळ्ळी, फिल्माच्या चित्रिकरणाचीं थळांय दिसलीं. ज्या गोंयांत सिनेमा संस्कृतायच नाशिल्ली ती आयनॉक्स थिएटरांतल्यान तयार जाल्या. पयल्या इफ्फी निमतान मल्टीप्लॅक्स उबारपाचो वावर जालो, सुदारणांय वर्सा कणकणीं जाल्यो. कला, संस्कृती भवनांनी मल्टीप्लॅक्स संस्कृताय हाडल्यार सोयरो इफ्फी गोंयभर भोंवंक शकतलो.
गोंयच्या तरणाट्यांक इफ्फीन माची दिली, साहित्य आनी संस्कृतायेक ती फुडारांत मेळपाक जाय. गोंयची धर्मीक संस्कृताय तिगल्या आनी ती तिगयल्ल्यान इफ्फी थिरावला. फुडारांत ती तिगपाक जायच त्या भायर गोंयचे विंगड विंगड धर्मीक संस्कृतायेचें, बदलांचें चित्रय साहित्यांतल्यान, सिनेमांतल्यान इफ्फी मेरेन सरकारय सिनेतज्ञांच्या आदारान पावंक शकता.
इफ्फी म्हणल्यार फकत सिनेमा न्हय जाल्यार साहित्यीक, तंत्रज्ञाचें संमेलन हें पयल्या इफ्फींत पावल दवरतना कळ्ळें ना. कितें हें तुमचें गोंय? गोंयकार इफ्फीक येना, गोंयचो सिनेमाय इफ्फींत दिसना, गोंयांत सिने संस्कृताय ना अशें म्हणटल्यांक पर्रीकार हांणी जापोय दिल्यो. इफ्फीक घर दिवपाचें उतरय तांणी दिलें पूण प्रकल्पाचो आरंभ जालो ना. इफ्फी भारताचो, गोंयांत सोयरो जावन फकत आठ – धा दीस येता, भोंवडेकारा वरी सिनेमा सोंपलो की साटली पोटली गुठलायता हें सत तांकां होल्मल्लें आसुंये.
इफ्फीच्यो पत्रकार परिशदोय आयज दिल्लींतल्यान जातात तेन्ना फिल्म सिटींतच एक मजलो इफ्फी खातीर दिवपाची तजवीज करप शक्य आसा.
365 दिसांनी इफ्फी खातीर अधिकारी, तंत्रज्ञ गोंयांत चडांत चड म्हयनो दोन म्हयने रावतात. इफ्फींतल्यान गोंयांत कार्यावळ आयोजन, वेवस्थापन वेवसाय संस्कृतायेची उमेद वाडयल्या, नवे सुत्रसंचालक, कलाकार, गितां बांदपी, गायक, बरोवपी, तंत्रज्ञय तयार जाल्यात. तांकां इफ्फीची माची मेळपाक थोडो अणभव घेवचो पडटलो. अणभवांतल्यान गायिका हेमा सरदेसाय, अभिनेत्री वर्षा उसगांवकार तीस- पस्तीस वर्सां आपल्या वेवसायाच्या मळांनी आयजय आसात. तांकां मानाचो पाट इफ्फींतल्यान दिवपा पासत कार्यावळ जातना गार्गी सिद्धये, ऋशिकेष ढवळीकार ह्या युवाशक्तीक मनरिजवण सोसायटी सलाम करूंक शकता.
इफ्फींतली पत्रकारिता वेगळी. खाशेल्यो खबरो, स्तंभलेखन, मुलाखती, परिसंवाद, मास्टरक्लासांतल्यान हेडलायनी, वेगळ्या सिनेमाचें लिखाण इफ्फींतल्यान मेळपी खावड. फोटोग्राफर, खबरांकार पांच पावचे नात. इफ्फीक व्हडा प्रमाणांत प्रसिद्धी दिवपाचें कामय गोंयच्या दिसाळ्यांनी केलां. आमचो वांटो आसाच तुमीय येयात अशें सांगपी सिने पत्रकारिता, समिक्षकांची पिळगीच घडोवपी ज्योती व्यंकटेश हांचे वरी व्यक्तीमत्वांची वळख गोंयच्या इफ्फींतल्यान जाली. सिने पत्रकारय आयज एकाद्रो सिनेमा इफ्फीचे माचये मेरेन पावयतात.
गोंय सरकाराचे सचीव प्रसाद लोलयेंकार हांचे दिगंत कथेचेर सिनेमा इफ्फींत हाचे आदीं दिसला, ते काणकोणचे. फिल्म सिटी खातीर तांचें मार्गदर्शन काणकोणांतल्या तरनाट्यांक दिका दिवपी आसतलें. संजय शेट्ये, ज्ञानेश मोघे हांचे वरी तरणाटे इफ्फींतल्यान जैतवंत दिग्दर्शक, निर्माते जाले, वेवसायांत मुखार गेले, मराठी चित्रपट महोत्सवय गोंयांत तांणी घडोवन हाडलो. फुडारांतय ते नवें कितें तरी सिनेमोग्यां खातीर दितले. संवसारा मुखार दवरतले.
इफ्फींतल्यान गोंयचीं खाणां – जेवणां संवसारांतल्या फिल्ममोगी, समिक्षक, ज्युरी मेरेन पावोवपांत आदले उपसभापती विष्णू वाघ हे वावुरिल्ले. गोंयच्या खाणा जेवणाचे परंपरेचें मुळूय देसाच्या खाणां – जेवणांचे परंपरेंत लिपिल्लें आसलें तरी गोंयची रूच वेगळीच मागीर तें मणगणें वा सुक्या सुंगटांची किस्मूर आसूं.
इफ्फींत येवपी स्त्रीशक्ती वाडत आसा, तांकां राखण, सुविधा सोंपेपणान मेळची, उसरां मेरेन खाणां – जेवणांचे स्टॉल्सय उकते उरचे ही अपेक्षा आसता. सरकारांतले मंत्री सुभाष फळदेसाय, पयलींचे आमदार दामोदर (दामू) नायक, राजेंद्र तालक आनी हेरांनी घेतिल्ल्या कश्टांनी इफ्फी उंचायेर पावला. निखील देसाय, अमेय अभ्यंकर, संजित रॉड्रिग्ज हे अधिकारी इफ्फी खातीर खूब वावुरिल्ले. तांच्यो यादी लिखाणांतल्यान येवच्यो.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
