भांगरभूंय | प्रतिनिधी
पणजीः फिल्म अँड टेलिव्हिजन इन्स्टिट्यूट ऑफ इंडिया (एफटीआयआय) पुणे वतीन दिव्यांगां खातीर 2 विशेश प्रशिक्षण वर्ग घेतले. सेंटर फॉर ओपन लर्नींग (सीएफओएल) ह्या उपक्रमा खाला संस्थेन राष्ट्रीय चित्रपट विकास म्हामंडळ आनी मनरिजवण संस्था गोंय हांच्या जोडपालवान हे खातीर फुडाकार घेतला. 20 ते 28 नोव्हेंबर ह्या काळांत मनरिजवण संस्थेच्या मॅकॅनीज पॅलेसींत ह्यो दोनूय कार्यशाळा जातल्यो.
ऑटिझम आशिल्ल्या लोकां खातीर स्मार्टफोन फिल्म मेकिंगचो मुळावो अभ्यासक्रम आनी व्हिलचॅराचो वापर करप्यां खातीर पड्ड्या वयल्या अभिनयाचो मुळावो अभ्यासक्रम शिकयतले. कला निर्मितीची प्रक्रिया सगळ्यांक सोंपी जावची ह्या उद्देशान हें प्रशिक्षण घेतले.
फिल्म मेकींग अभ्यासक्रम व्हिज्युयल कम्युनिकेशन मळा वयले नामनेचे अजमल जामी प्रशिक्षण वर्ग घेतले. ह्या अभ्यासक्रमांत चित्रपटाची भास कशी आसता, ताची वळख ते स्मार्टफोनाच्या आदारान चित्रिकरण आनी संपादन करपा मेरेन खूबश्यो गजाली शिकयतले. ह्या विभागांत अखेरेक स्किनींग आनी नियाळ घेवपाचें सत्र दवरलां. इत्सुकांनी अदीक म्हायती आनी नांव नोंदणी खातीर एफटीआयआयच्या अधिकृत संकेतथळाचेर संपर्क करचो, अशें कळयलां.
अभिनय अभ्यासक्रम जिजॉय पी. आर. घेतले. अभिनयाच्या अभ्यासक्रमाचे 6 विभाग केल्यात. अभ्यासक्रमाची सुरवात नाट्यशास्त्राची वळख करून जातली. ह्या अभ्यासक्रमांत कॉमेडी म्हणल्यारूच हास्यरस शिकोवपाचेर भर दितले. इत्सुकांनी अदीक म्हायती आनी नांव नोंदणी खातीर इफ्फीच्या अधिकृत संकेतथळाक भेट दिवची, असो आयोजकांनी उलो मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
