भांगरभूंय | प्रतिनिधी
नेव्हील आफोन्सोः अट बदलून तांक उणी करतले
भांगरभूंय । प्रतिनिधी
पणजी: इथेनॉल प्रकल्पा खातीर आदीं जारी केल्ल्या बोलीच्या निविदांक (आरएफक्यू) प्रतिसाद मेळूंक नाशिल्ल्यान आतां अटींत बदल करून परतून निविदा जारी जातली. पयलींची आरएफक्यूची निविदा 45 कील लिटर दर दिसा इथेनॉल तयार करपाची आशिल्ली. ही तांक उणी करून निविदा जारी जातली, अशी म्हायती शेती संचालक नेव्हील आफोन्सो हांणी दिली.
हो प्रकल्प पीपीपी तत्वाचेर उबारतले. सरकारचें पीपीपी खातें नव्यान निविदा जारी करतलें. 700 टन ऊसाच्या वापरान दिसाक 45 कील लिटर इथेनॉल तयार करपा खातीर पयली आरएफक्यू जारी केल्लो. कोणा कडल्यानूच बोली येवंक ना. हाका लागून इथेनॉल प्रकल्प सुरू करपाविशीं हालचाली जावंक नात. आतां इथेनॉल निर्मितीची तांक दिसाक 45 किला लीटर वयल्यान उणीं करपाचो विचार सुरू आसा. तांक कितली करची, हाचो निर्णय जावंक ना. गोंयांत दिसाक 700 टन ऊस मेळप कुस्तार, अशें आफोन्सो हांणी सांगलें.
80 कोटींच्या इथेनॉल प्रकल्पांत 235 जाणांक नोकऱ्यो मेळपाची आस्त आसा. संजीवनीच्या कामगारांक इथेनॉल प्रकल्पांत कामाक घेवपाचें आस्वासन सरकारान दिलां. संजीवनी साकर कारखानो चलोवप परवडना, म्हूण सरकारान पोरूं इथेनॉल प्रकल्प सुरू करपाचो निर्णय घेतलो. ऊस शेतकारांचे प्रस्न समजून घेवपा खातीर आदले खासदार अॅड. नरेंद्र सावयकार हांच्या फुडारपणा खाला समिती स्थापन केली. इथेनॉल प्रकल्प सुरू करपा खातीर पुणेच्या डेक्कन साकर संस्थे कडल्यान अहवाल मागयलो. ते संस्थेन अहवाल सादर केला. अहवाल सादर जाले उपरांत सरकारान आरएफक्यू खातीर निविदा मागयल्यो. आरएफक्यू निविदेक प्रतिसाद मेळंक नाशिल्ल्यान इथेनॉल प्रकल्प इतले बेगीन सुरू जावप कुस्तार.
इथेनॉल प्रकल्प सुरू करपाविशीं ठोस निर्णय जाहीर करपाची मागणी ऊस उत्पादक शेतकार संघटणेन केल्या. 2 जानेवारीच्यान शेतकार संजीवनी कारखान्याचे गेटी मुखार धरणे आंदोलन करतले, अशी शिटकावणी संघटणेचे अध्यक्ष राजेंद्र देसाय हांणी दिल्या. संजीवनी साकर कारखानो बंद जावन तीन वर्सां जाली. कारखानो बंद करतना सरकारान उस शेतकारांक विस्वासांत घेवंक ना, म्हूण शेतकार चाळावल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
