भांगरभूंय | प्रतिनिधी
इंडियन आॅयल कंपनीचे चॅरमन एस. एम. वैद्य हांणी हालींच पुणेंच्या येरवडा बंदखणीच्या स कैद्यांचो भोवमान केलो. संवसारीक बुद्दीबळ फेडरेशनान (फिडे) आॅनलायन आयोजीत केल्ल्या आंतरखंडीय ‘चेस फाॅर फ्रीडम’ सर्तीत भारता खातीर तांणी कांश्यां पदक मेळयिल्ले खातीर हो सत्कार आयोजित केल्लो. 46 देशांतल्या 85 पंगडांनी हे सर्तींत वांटो घेतलो. भारतांतल्या बंदखण पंगडांनी हातूंत पयलेच खेप वांटो घेतिल्लो. वैद्य हांचे संकल्पनेंतल्यान तयार जाल्ल्या ‘परिवर्तन – बंदखण ते स्वाभिमान’ ह्या उपक्रमा खाला भारतीय पंगडांक प्रशिक्षण दिल्लें. कैद्याचो शारिरीक आनी मानसिक विकास जावचो हे खातीर तांकां बुद्दीबळ, बास्केटबाॅल, बॅडमिंटन, व्हाॅलिबाॅल आनी कॅरमाचें प्रशिक्षण दितात.
ह्या वेळार कैद्याक इंडियन आॅयल कंपनीचे देखरेखी खाला प्रशिक्षण दिवपी केतन खैरे, येरवडा बंदखणीचे सुपरिटेंडंट शिवशंकर पाटील हांचोय भोवमान जालो. पाटील हांकां लागून हे कैदी हे सर्तींत वांटो घेवपाक शकले.
ह्या वेळार वैद्य हांणी सांगलें, जिखपा खातीर तुमी सदांच मुखार वचपाक पावलां उखलपाक जाय अशें ना. एक पावल फाटीं घालून मागीर बऱ्या फुडाराचे दिशेन मुखार, आनीक मुखार वचपाक शकतात.
मजगतीं, हे सर्तींनी भारतांतल्या 20 बंदखणींतल्या कैद्यांनी वांटो घेतलो. तातूंतल्या पुणे, प्रयागराज बंदखणींनी आंतरराष्ट्रीय बुद्दीबळ सर्तींत वांटो घेतलो. तर तिहार बंदखणीच्या बायलां आनी भुरग्या कैद्यांनीय दुसऱ्या सर्तींनी वांटो घेतलो. इंडियन आॅयल कंपनी 15 आॅगस्ट 2021 सावन 37 बंदखणींतल्या (20 राज्यां आनी 5 केंद्र शासीत प्रदेश) 1750 कैद्यांक साबार खेळांचें प्रशिक्षण दिलां. कंपनींत कांय आंतरराष्ट्रीय खेळगडे आसात, ते ह्या प्रशिक्षणाचेर नदर दवरून आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
