भांगरभूंय | प्रतिनिधी
खबरां संस्था
मेलबर्नः इंग्लंड क्रिकेट इतिहासांतलो पयलो डबल वर्ल्ड चॅम्पियन जालो. मेलबर्न मैदानार आयतारा जाल्ले टी-20 वर्ल्ड कप फायनलींत पाकिस्तानाक 5 विकेटींनी होरोवन 2010 उपरांत इंग्लड दुसरे फावट टी-20 चॅम्पियन थारलो. पोरूं इंग्लंडान वन-डे वर्ल्ड कप आपल्या नांवार केल्लो. वन-डे आनी टी-20 वर्ल्ड कप जिखपी इंग्लंड पयलो क्रिकेट पंगड थारला.
बेन स्टोक्साचो नाबाद (52) अर्द शेंकडो आनी सॅम कुरनान 12 धांवड्यांत पाकिस्तानाच्यो 3 विकेटी घेवन पंगडान टी-20त दुसरे फावट म्हा जैत मेळोवन दिले. कुरनाक मॅन ऑफ दी मॅच तशेंच टी-20 माळेंतलो बरो खेळगडो म्हणून पुरस्कार दिवन भोवमानीक केलें. पाकिस्तानान जैता खातीर दिल्ल्या 138 धांवड्याचो फाटलाव करतना इंग्लंडाक पयलेच ओव्हरींत धपको बसलो. भारता आड सेमी फायनलींत नाबाद अर्द शेंकडो करपी ऍलेक्स हेल्साक (1) शाहीन आफ्रिदीन बोल्ड केलें. आडखळत खेळपी फिल सॉल्ट फकत 10 धांवड्यो करून आवट जालो. कॅप्टन जोस बटलरान 17 बॉलांत 26 धांवड्यो केल्यो. बटलर आवट जालो आनी इंग्लंड पंगडा सामकार संकश्ट उबें रावलें. मात अणभवी बेन स्टोक्सान हॅरी ब्रुक वांडा 39 धांवड्यांची म्हत्वाची भागिदारी केली. स्टोक्सान नवाझाचे बॉलिंगेचेर हल्लाबोल करून इंग्लंडाक जैताचें दार उक्तें करून दिलें. मोईन अलीन वसिमाक तीन चौके मारून पाकिस्तानाची हार निश्चीत केली. ताणे 13 बॉलांत 19 धांवड्यांचें योगदान दिलें. स्टोक्सान आपलो अर्द शेंकडो पुराय करून पंगडाची 19 वे ओव्हरींत जैताची धांवडी काडली.
मेलबर्नाचे खेळपट्टेर इंग्लंडान टॉस जिखून पयलीं बॉलिंग करपाचो निर्णय घेतलो. तांच्या बॉलरांनी कॅप्टन बटलराचो हो निर्णय सार्थ थारयत पाकिस्तानाक 20 ओव्हरींत 8 बाद 137 धांवड्यांचेर आडायलें. स्पीनर आदिल राशिद आनी सॅम कुरनान भारता आडचे सेमी फायनली उपरांत फायनलींत लेगीत बरी बॉलींग केली. दुसरे फावट टी-20 कप जिखपाच्या निर्धारान मैदानार देंवल्ल्या दोनूय पंगडांनी आपल्या पंगडांत कसलेच बदल केले नात. पयलीं खेळटना बाबर आझम आनी मोहमम्द रिझवानान हांणी 29 धांवड्यांची सलामी दिली. रिझवान फकत 15 धांवड्यो करपाक शकलो. मोहम्मद हॅरीस हे मॅचींत अपेशी थारलो. बाबरान 28 बॉलांत 32 धांवड्यो केल्यो. शान मसूदान 38 जाल्यार शादाब खानान 20 धांवड्यो केल्यो.
इंग्लंडाच्या बॉलरांनी धारदार बॉलिंग करून एकाय पाकिस्तानी बॅट्समनाक चड धांवड्यो करपाक दिल्यो नात. सॅम कुरनान 4 ओव्हरींत फकत 12 धांवड्यो दिवंन 3 विकेटी घेतल्यो. आदिल राशिदान बाबर आझमान आवट करून इंग्लंडाचे वाटेतलो व्हडली आडमेळ पयस केली. ताणे 22 धांवड्यांत 2 विकेटी घेतल्यो. ख्रिस जॉर्डनाय 2 विकेटी घेतल्यो. पाकिस्ताना वतीन शान मसूदान सगल्यांत चड 38 धांवड्यो केल्यो
( स्कोरबोर्डः – पाकिस्तान 8 आवट 137. रिझवान-15, बाबर- 32, मोहम्मद हॅरीस- 8, मसूद- 38, इप्तिकार- 0, शादाब खान- 20, नवाज- 5, मोहम्मद वसीम ज्यु.- 4, शाहीन आफ्रिदी- नाबाद-4, हॅरीस रावफ नाबाद- 1. एक्स्ट्र- 9. विकेटी- 29-1, 45-2, 83- 3, 85-4, 121- 5, 123- 6, 129-7, 131-8. बॉलींग- बेन स्ट्रोक्स 1-32, कुरन- 3-12, राशिद- 2-22 जॉर्डन- 2- 27
इंग्लंड- 5 आवट 138. जोस बटलर- 26, आलेक्स हॅल्स- 1, फिलीप सॉल्ट- 10, बेन स्ट्रोक्स नाबाद 52, हॅरी ब्रूक- 20, मोईल अली- 19, लिव्हिंगस्टोन नाबाद- 1. एक्स्ट्रा- 9. विकेटी- 7-1, 32-2, 45-3, 84- 4, 132- 5. बॉलींग- शाहीन आफ्रिदी- 1-13, हॅरीस रावफ- 2-23, शादाब खान- 1-20, वसीम ज्यु- 1-38)
शाहीन आफ्रिदीन घेतिल्ली कॅच
पाकिस्तानाक पडली बरीच म्हारग
मेलबर्न- इंग्लंड- पाकिस्ताना मदले टी-20 फायनलींत ट्विस्ट अँड टर्न दिसून आयलें. जैता खातीर 138 धांवड्यो करपाक आयिल्ल्या इंग्लंडाच्या बॅट्समनांक पाकिस्तानाच्या बॉलरानी सुरवेक सावन आडावन धरिल्लें. शाहीन आफ्रिदीन म्हत्वाच्या वेळार विकेटी घेतल्यो मात पंगडाक सामको जाय आशिल्लो तेन्ना कॅच घेतले उपरांत ताच्या धोपराक दुखापत जाली आनी इंग्लंडाक व्हडली संद मेळ्ळी.
स्पीनर शादाब खानाचे बॉलिंगेचर बाऊंड्री कडेन हॅरी ब्रूकाची कॅच घेवन शाहीन आफ्रिदीन पंगडाक एक विकेट घेवन दिली. मात ह्याच वेळार ताच्या धोपराक दुखापत जाली. हे उपरांत आपली तिसरी ओव्हर घालपाक तो आयलो मात दुखापतीक लागून ताका बॉलींग करप शक्य जालें ना. हे ओव्हरींतलो तो फकत एक बॉल घालपाक शकलो. ताची ही ओव्हर मोहम्मद इफ्तिकारान पुराय केली. ह्या वेळार बेन स्टोक्सान एक चौको आनी एक सको मारलो. आनी होच इंग्लंडा खातीर टर्निंग पॉईंट थारलो. शाहीन आफ्रिदी धोपराचे दुखापतीक लागून अदूंच्या आशिया कप सर्तींतल्यान भायर रावचें पडिल्लें. टी-20 वर्ल्ड कपाचे पयलीं तो फीट जावन परत पंगडांत आय़िल्लो.
कुरनान मोडलो 12 वर्सांचो विक्रम
मेलबर्न- मोहम्मद रिझवानाक बोल्ड करून इंग्लंडाच्या सॅम कुरनान 12 वर्सांचो पोरणो विक्रम मोडलो. कुरनान पांचवे ओव्हरींत रिझवान आनी बाबर ही जोडी फोडली. रिझवानाक आवट करून कुरन टी-20 वर्ल्ड कपांत इंग्लंडा वतीन सगल्यांत चड विकेटी घेवपी बॉलर थारलो. ताणे शान मसूद आनी मोहम्मद नवाजाक लेगीत आवट केलें.
कुरनाच्या नांवार आता टी-20 वर्ल्ड कपांत 13 विकेटी जाल्यात. हाचे पयलीं इंग्लंडाच्या रायन सायडबॉटमान 2010चे टी-20 वर्ल्ड कपांत 10 विकेटी घेतिल्लो. तेन्नाय इंग्लंड टी-20 चॅम्पियन थारिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
