भांगरभूंय | प्रतिनिधी
विल जॅक्साच्यो 73 धांवड्यो आनी सॅम करनाच्या तीन विकेटींच्या नेटार इंग्लंडान येजमान वॅस्ट इंडिजाक दुसरे वन डे मॅचींत 6 विकेटींनी हारोवन तीन मॅचींचे माळेंत 1-1 अशी बरोबरी सादली.
टॉस हारल्या उपरांत पयलीं बॅटींग करपी वॅस्ट इंडिजाक 40 ओव्हरींनी 202 धांवड्य करप शक्य जाल्यो. जॅक्साच्या दुसऱ्या अर्द शेंकड्याचे मजतीन इंग्लंडान 33 ओव्हरींनी 4 विकेटी वगडावन 206 धांवड्यो केल्यो.
वॅस्ट इंडिजा वतीन पयले मॅचींत नाबाद 109 धांवड्यांची खेळी करपी शाई होपान 68 धांवड्यांची खेळी केली. एका वेळार वॅस्ट इंडिजान सात ओव्हरींनी 4 बाद 23 असो स्कोर आशिल्लो. पूण, उपरांत होपान शेरफान रदरफोर्ड (63) हाच्या वांगडा मेळून 129 धांवड्यांची भागिदारी करून डाव सांबाळ्ळो. होपान 44 बॉलांनी अर्द शेंकडो पुर्ण केलो. ताणें 68 बॉलांनी 68 धांवड्यो केल्यो. रदरफोर्डान 71 बॉलांनी अर्द शेंकडो पुर्ण केलो.
मोखीचो फाटलाव करपी इंग्लंडा वतीन जॅक्सान फिल सॉल्ट (21) हाच्या वांगडा 50 धांवड्यांची भागिदारी केली जाल्यार 43 बॉलांनी अर्द शेंकडो पुर्ण केलो. जॅक क्रावले आनी बेन डकेट रोखडेच बाद जाले. पूण, हॅन्री ब्रूक आनी जोस बटलर हाणें 17.1 ओव्हरी बाकी आसतना पंगडाक जैत मेळोवन दिलें.
बटलरान 58 आनी ब्रुक 43 धांवड्यो करून नाबाद रावले.
मजगतीं, बटलरान 36वी धांवडी घेना फुडें वन डे क्रिकेटींतल्यो 5 हजार धांवड्यो पुर्ण केल्यो. ते पयलीं मॅचीचे सुरवातीक वॅस्ट इंडिजाच्या होप हाणें हो आंकडो हुपिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
