भांगरभूंय | प्रतिनिधी
इंग्लंडान येजमान पाकिस्तानाचो दुसरो डाव 210चेर सोंपयल्या उपरांत मोखीचो वेगान फाटलाव करपाक सुरवात केल्या. तिसऱ्या दिसाचो खेळ सोंपलो त्या वेळार ताणें 17 ओव्हरींनी 2 विकेटी वगडावन 112 धांवड्यो केल्यात. बेन डंकेट 50 आनी मुखेली बेन स्टोक्स 10 धांवड्यो करून खेळपट्टीचेर आसा. ताका जैता खातीर आनीक 55 धांवड्यांची गरज आसा.
सध्या तो माळेंत 2-0 असो मुखार आसा आनी सध्या ताची नदर क्लीन स्विपाचेर स्थिरावल्या.
ते पयलीं जॅक लीच आनी रेहान अहमद हांणी पाकिस्तानाची सुरवातूच इबाडून उडयली. सगल्यांत पयलीं लिचान स बॉलांनी तीन विकेटी घेवन पाकिस्तानाक बॅकफुटाचेर धुकल्लो. ते उपरांत रेहान अहमदान पांच विकेटी घेतल्यो.
पाकिस्ताना वतीन बाबर आजमान 54 आनी सउद शकील हाणें 53 धांवड्यांची खेळी केली. हे मजगतीं, अंदूं एक हजार धांवड्यो पुर्ण करपी तो चवथो बॅट्समन थारलो. अर्द शेंकडो पुर्ण केल्या उपरांत आक्रमक शॉर्ट मारपाच्या यत्नांत मिडविकेट वाठारांत कॅच बाद जालो.
बाबराक बाद केल्या उपरांत अहमदान सेगीत दोन ओव्हरींनी मोहम्मद रिजवान (7) आनी शकील हाका बाद करून इंग्लंडाची स्थिती घटमूट केली.
चवथ्या डावांत इंग्लंडाक जैता खातीर 167 धांवड्यांची मोख मेळ्ळी. ताणें आक्रमक सुरवात केली. जॅक क्रावलेन 41 बॉलांनी 41 धांवड्यो केल्यो. जाल्यार बेन डंकेटान 38 बॉलांनी 8 चवक्यांचे मजतीन 50 धांवड्यो करून खेळपट्टीचेर आसा. दोगांयनी पयले विकेटी खातीर 87 धांवड्यांची भागिदारी केली. रेहानाक तिसरे सुवातेर बॅटिंगेक धाडलो. पूण, तो 10 धांवड्यो करून बाद जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
