इंग्लंडांतल्या लिसेस्टर क्रिकेट मैदानाक भारताच्या सुनील गावस्कार हांचें नांव

भांगरभूंय | प्रतिनिधी

खबरां संस्था
लंडनः ब्रिटिशांनी भारताचेर 150 परस चड वर्सां राज्य केलें. ह्या काळांत भारतीय लोकांक तुच्छ वागणूक दिली. मात स्वातंत्र्या उपरांतच्या 75 वर्सांत स्थिती सामकी बदलल्या. आजय भारतीय वंशाची एक व्यक्ती ब्रिटनच्या पंतप्रधान पदार बसपाचे वाटेर आसा. तातूंत भारतीयां खातीर आनीक एक अभिमानाची गजाल घडल्या. इंग्लंडांतल्या एका क्रिकेट मैदानाक भारताचो आदलो कॅप्टन सुनील गावस्कार हांचें नांव दिलां.
लिसेस्टर क्रिकेट मैदानाक गावस्कार हांचें नांव दिलां. नामकरण करपाची कार्यावळ शेनवारा जाली. इंग्लंडांतल्या एकाद्र्या क्रिकेट मैदानाक भारतीय क्रिकेटीयराचें नांव दिवपाची ही पयलीच वेळ आसा. लिसेस्टर मैदानाचें नांव बदलपाची मोहीम भारतीय वंशाचें गोंयकार खासदार कीथ वाझ हांणी सुरू केल्ली. तांणे ब्रिटिश संसदेंत खूब तेप लिसेस्टराचें प्रतिनिधीत्व केलां.
लिसेस्टरांतल्या क्रिकेट मैदानाक म्हजें नांव दिलां हे खातीर म्हाका खूब खोस भोगता. लिसेस्टरांत क्रिकेटीक व्हड तेंको मेळटा. म्हजे खातीर हो व्हडलो भोवमान आसा अशें गावस्करान सांगलें. गावस्कार संवसारांतले म्हान क्रिकेटीयर आसात. ते फकत लिलट मास्टरूच न्हय जाल्यार क्रिकेटींतले ग्रेट मास्टर लेगती आसा अशें कीथ वाझ हांणी सांगलें.
टेस्ट क्रिकेटींत 10 हजार धांवड्यो करपी गावस्कार पयले भारतीय क्रिकेटीयर आसात. टॅस्ट क्रिकेटींत सगल्यांत शेंकडे करपाचो विक्रम ताच्या नांवार आशिल्लो. सचीन तेंडुलकारान तो मोडलो. गावस्कार भारता खातीर 125 टॅस्ट मॅची खेळून ताणे 34 शेंकडे करून डॉन ब्रॅडमन हांचो विक्रम मोडल्लो. विदेशांत गावस्कार हाचो भोवमान जावपाची पयली खेप न्हय. हाचे पयलीं अमेरिकेंतल्या केंटकी हांगच्या एक मैदानाक सुनील गावस्कार फिल्ड अशें नांव दिल्लें. टांझानियांतल्या जंजीबारांत सुनील गावस्कार क्रिकेट स्टेडियन तयार करतात.