भांगरभूंय | प्रतिनिधी
माधवपूर गांवांत अजय नांवाचो एक भूरगो रावतालो. अजय हो एक बरो शिकिल्लो तरणाटो. सदाच तोंडार हांसो, दुसऱ्यांक मजत करपाक फुडें सरपी, दुसऱ्यांच्या भुकेचो विचार करपी, अश्या जायत्या बऱ्या गुणान तसो तो फामाद आशिल्लो. आपणाल्या मोगाळ सभावान सगळ्यां कडेन ताचें बरें जुळटालें. कोणा कडेनय तो कारणा शिवाय ओगीच चड उलोवपाक वच नाशिल्लो. घडये कोणाकय दिसता आसतलें की तो उलोवपाक कमी पूण तशें नाशिल्लें. संस्कार म्हणल्यार कितें तें कोणेंय अजया कडल्यान शिकचें. फेसबूक इन्स्टाग्राम हाच्या पसून तो सामकोच पयस रावतालो.
शिक्षण पुराय जातकीच तो एका खाजगी कंपनींत कामाक लागता. काय तेंपान थंय एक पुजा नांवाची चली कामाक येता. अजय आनी पुजा तशीं पयलेच खेपे एकामेकाक मेळिल्लीं. दोगानूय हांच्या पयली केन्नाच एकामेकाक पळोवंक लेगीत नाशिल्लें. जशे दीस वतात तशी तांची इश्टागत वाडटा. बराबर काम करप, च्या घेवप-जेवप, उठप-बसप,केन्ना केन्ना बराबर कामार एकाच गाडयेन येवप वचप अशें करून दीस वताले. फेसबूक आनी इन्स्टाग्राम हाच्या पसून अजय सामकोच पयस रावतालो. तो सदांच म्हणटालो ताच्या शिवाय म्हजें कसलेच काम उरना जाल्यार कित्याक म्हूण ओगीच त्यो फेसबूक वा
न्स्टाग्राम हांच्यो भानगडी..! तें ना तेच बरे! पूण पुजान केल्लो हट्ट पुराय करपा खातीर अजय कांय दिसा खातीर फेसबूक वापरूंक लागता. आतां तर कामारूच न्हय फोनार तशेंच फेसबुकार तीं जाय तो वेळ घालयतालीं अशें करून कांय तेपान तीं दोगांय एकमेकाच्या मोगांत पडटात. जेन्ना अजयाक ताच्या लग्ना विशीं ताचे इश्ट विचारताले तेन्ना तो आपल्याक एक सादें भोळें, दिसपाक जरी तितलें बरें ना, तशेंच चड शिकून ना तरी उपकारता पूण दुसऱ्याक समजून घेवपी, बरें संस्कार आशिल्लें, बऱ्या संस्कारान वाडिल्लें, सगळ्यां कडेन बरे भशेन रावपी, गोड उलोवपी चली मेळटकीच लग्न जातलों अशें हांसत हांसत तो उलोवन दाखयतालो. आनी अजयाक हें सगळें जाय आशिल्लें गूण पुजांत भितर दिश्टी पडटालें
पुजा तशें कमीच उलोवपी. पळोवपाक खूब बरें दिसतालें. अजय कितें विचारता त्या प्रस्नाचे हय वा ना उतरान अशीं इतलींच जाप पुजा दिवन रावतालें. तीं दोगांय एकाच ऑफीसांत काम करतालीं. तशें पळोवपा गेल्यार तांकां दोगांकूय जाय जाल्यार एकामेका बराबर जाय तशे दीस घालोवपाक मेळटाले. दोगांय बऱ्या संस्कारांत वाडिल्लीं असल्या कारणान तांकां तशें लग्ना पयलीं हांगां थंगां भोंवप नाका आशिल्लें. तांणी आपणालें नांव बरें राखून दवरिल्लें. आपणा कडल्यान केन्नाच कितें वायट घडचें ना हांची अजय खूब जतनाय घेतालो. नांव मिळोवपा खूब वेळ लागला पूण नांव वगडावपा वेळ लागना अशीं उतरां जाय ते फावट अजयाच्या तोंडांतल्यान आयकूंक मेळटाली.
फुडें चलता
सत्यवान जांगळी
9923697659
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
