भांगरभूंय | प्रतिनिधी
केन्ना- केन्ना एक बरो वाचपी व्यक्तीचित्रण वाचप पसंद करता. कित्याक तातूंत दुसऱ्याचें जिवीत सांगिल्लें आसता जें वाचप्याच्या जिविताची वळख घडयता, स्वता विशीं चड शिकयता आनी भोवंतणच्या संवसारांत आपूण खंय बसता ताची जाणवाय दिता. जेन्ना दुसऱ्याचें बरें जिवीत वाचता तेन्ना, आपलें जिवीत ताचे भशेन बरें करपाचें तातूंत मार्गदर्शन मेळटा. ताणें कितें तरी बरें केलां म्हूण ताचें चरित्र दुसऱ्यान बरयलां वा ताणें स्वता बरयलां, तें वाचून वाचपी प्रभावीत जाता आनी आपणा भितर बरेपणां हाडूंक वावुरता. हे खातीर संत-भक्तांचीं चरित्रां वाचप चड लोक पसंद करता. अशेंच ‘गोंयचो सायब’ हें मायकल ग्रेशियस हाचें पुस्तक वाचपाचो योग आयलो. पुस्तक क्विनी प्रोडाक्शन ऍन्ड पब्लिकेशनान उजवाडायलां जाल्यार तें अॅड्स प्रिंटर्सान छापलां. भायलें कव्हर दादाजिराज शिरोडकार हाणें चित्रायलां आनी फाटल्या कव्हराचेर बरोवप्याची वळख आसा. पुस्तकाक 136 पानां आसात आनी ताचें मोल 200 रुपया आसा. भाग्यवंत फ्रांसीस शावियराच्या जिविताचेर खोलायेन उजवाड घालपी पुस्तका खातीर मायकल ग्रेशियसाक शाबासकी आनी परबीं.
फाटभूंय
धा वर्सां फाटीं जेन्ना सायबाचें एक्सपोजिसांव जाल्लें, तेन्ना मायकलान गोंयच्या सायबाच्या जिविताचेर एक ल्हान नाटकुलें सादर केल्लें. तेन्नाच सायबाचेर अभ्यास करूंक ताचें मन आशिल्लें, पूण फाव तशीं पुस्तकां हाताक लागूंक नाशिल्ल्यान बरप करूंक अवघडाय आयली. तरी आपूण सोद- वावर करतोलोंच म्हूण ताणें निर्णय घेतलो. हाचोच परिणाम, धा वर्सां उपरांत हें पुस्तक तयार जालें.
पुस्तकाचो गाभो
‘गोंयचो सायब’ हें पुराय पुस्तक सां फ्रांसीस शावियराच्या जिविताचेर आदारीत आसा. तें बावीस भागांनी वांटलां. सुरवातेक बरोवपी फ्रांसीसाच्या ल्हानपणांतली गजाल सांगता. मागीर ताच्या उंचल्या शिकपा विशीं आनी चवथ्या भागांत ताचो सभाव – फ्रांसीस शावियर व्हडपणान जियेवन आयिल्लो, आस्तीग फामिलींत जल्मल्लो आनी वाडिल्लो, ताचे सेवेक चाकरां आशिल्लीं. हेच खातीर तो पॅरीस शिकतना ताचे सेवेक एक खास विद्यार्थी आशिल्लो. कॉलेजींत शिकतना तो सगळ्यां परस ‘उंच उडी’ मारपी आशिल्लो, ताका लागून जायत्यांची ताचेर नदर आशिल्ली. शिवाय तो हुशार आनी श्रेश्ठ आशिल्लो. ह्या सगळ्या व्हडपणान ताका वेढो घाल्लो आसतना ताचो गुरू इनास दे लॉयोला हाचें एक वाक्य ताका सतावंक लागलें, ‘सगळो संवसार जोडून तुजो ऑत्मो इबाडलो जाल्यार मनशाक कसलो आदाव?’ सवका- सवका ताची मन- बदलणी जाली आनी तो देवाक शरण गेलो, एक पाद्री जालो. पाद्री जातकच ताणें आपणाकूच दुसऱ्यांचे सेवेक अर्पीत केलो.
पांचव्या भागांत बरोवपी वॅनीस शारांतल्या हस्पिटलांतली एक आंग शिरशिरपी घडणूक मुखार हाडटा. एक कोड जाल्लो पिडेस्त म्हूणटा, ‘भावा उपकार करून म्हजी फाट खरप” फ्रांसीस ताची फाट खरपीता पूण ताची मातेर पळेवन ताका ओंकारे येतात. ही स्थिती तो जेजूक भेटयता. त्या कोडकाराची सगळी मातेर एकठांय करता आनी जेजुच्या नांवान आपल्या तोंडांत घालता.
एक आस्तीग मनीस देवाच्या वावरांत मिसळ जावंक आनी पुर्तुगालाच्या दुताचो हुकूम मांनूंक फकत एक आंगलें घेवन भारतांत येवंची तयारी करता, इतलो तो स्वताकूच दुबळो करून घेता. ह्या सर्वस्व त्यागाचें बेस-बरें वर्णन सातव्या भागांत थावन वाचूंक मेळटा. तो लिसबोवा साकून तारवाची लांबदीग यात्रा करून गोंयांत येता आनी क्रिस्ती धर्मप्रगटणेच्या वावराक लागता. हो वावर कशे तरेन विस्तारलो, ताका कसल्या- कसल्या आव्हानांक फुडो करचो पडलो, धर्मप्रसारणाक लागून गोंय सोडून खंय- खंय वचचें पडलें, धर्मीक यात्रा करतना ताचे सांगाती, तो कोणा- कोणाक मेळ्ळो, कसलीं- कसलीं अचर्यां केलीं, स्वताचे पिडेक ताणें कसो फुडो केलो, कसले कश्ट सोंसले आनी तो मेलो तेन्ना ताचेच कुडी सवें कसलीं अजापां घडलीं हांचे विशीं बरीच म्हायती ह्या पुस्तकांत मेळटा. विसाव्या भागांत बरोवपी इंक्विजिशना विशीं म्हायती दिता आनी सायब निरपराधी आशिल्ल्याची गवायकी दिता. निमाण्या भागांत बरोवपी सां फ्रांसीसाक गोंयचो सायब कित्याक म्हूणटात हाचे विशीं स्पश्टीकरण दिता.
खाशेलेपण
हें पुस्तक न्हय फकत कोंकणीचे रोमी लिपींत बगर देवनागरी आनी कन्नड लिपिंतूय छापलां. ते शिवाय इंग्लीश, माळयालम, हिंदी आनी मराठी भाशेंतूय छापलां. मूळ कोंकणी भाशेंतलें अशें चरित्र पुस्तक आनीक कोणाचें घड्ये आसा आसतलें. हे खातिरूय बी मायकलाक आनी प्रकाशक आग्नेल आल्कासोअसाक वालोर. ह्या पुस्तकाचें आनीक एक खाशेलेपण म्हूणल्यार ह्या पुस्तकाक आर्च बिशपाची धर्मीक परवानगी आसा. पुस्तकांत डॉ. प्रवीण मार्तीस एस. जे., कार्डिनल बिशप फिलीप नेरी फेर्रांव, आदारी बिशप सिमांव फेर्नांडीस हांची म्हत्वाचीं बरपां आसात. पुस्तकांत घटना प्रमाणें बरीच चित्रां पळोवंक मेळटात.
पुस्तकांतली भास
पुस्तकांतली भास सादी आनी सामान्य वाचप्यांक समजतली अशी आसा. कांय कडें पवित्र पुस्तकांतल्या उताऱ्यांचो उपयोग केला, ताची नोंदणी दिल्या. दुसऱ्या भासांतलीं कांय उतरां पुस्तकांत आयल्यांत तीं ‘इटालीक’ केल्यांत. कांय कोंकणींतलीं उतरां लेगीत नदरेक येवंचे खातीर ‘इटालीक’ करून दाखयल्यांत. कांय अस्सल कोंकणी उतरां मेळटात, देखीक – ‘रायाळ’ (रॉयल), ‘कोनीग’ (कॅनन), ‘कॉर्दांव’ (कॉर्ड), ‘नुस्तेमारी खाण’ (फिशरीस कोस्ट), आदी.
प्रकाशकाचे उत्फर्के
आग्नेल आल्कासोअस आपल्या उतरांनी म्हूणटा, “हें पुस्तक खूब सोदवावर करून बरयलां, साबार म्हत्वाचे मुद्दे मांडून ताणें (मायकलान) एक बरो नियाळ आमचे मुखार दवरला. हें पुस्तक दर गोंयकाराच्या हातांत आपले आवडटे भाशेंत आनी लिपियेंत आमी दवरतात जाल्यार वाचून ताचो बरो आस्वाद घेवंक आमची अपेक्षा आनी आवंडे.”
बरोवप्याचे आवंडे
बरोवपी मायकल म्हूणटा, “पुस्तकाच्या वावरांत मिसळ जाल्लो आसतना इंक्विजिशनाचेरूय सोदवावर करपाची संद म्हज्या हाताक लागली. इंक्विजिशनान जाल्ल्या वायटाक सायब जबाबदार म्हूण कांयजाण आरोप करताले तेन्ना म्हजे वटेन सत कितें तें उग्तें करपाच्या वावराकूय लागलों… सायबाचेर बगलांटां घालतात तांचें मन उजवाडावंक एक चूड जातली म्हूण हांव मानतां.”
सोंपयतना…
‘गोंयचो सायब’ हें पुस्तक समेस्त गोंयकारांनी वाचचें. कित्याक ताचेर भावार्थ दवरपी क्रिस्तांवूंच न्हय तर हेर धर्मीय आसात हाची कितलेच पावटीं खात्री मेळ्ळ्या. ह्या पुस्तकांत जायतीं सतां लिपिल्लीं आसात, तांचीय जाणवाय गोंयकारांक मेळूंक फावो. एका भाग्यवंताचें चरित्र म्हूण न्हय तर मनशा भितर जावपी बदलांची शिकवण म्हूण वाचचें. असलें बरें- बरें लिखाण मायकला कडल्यान आनिकूय घडचें अशी आस्त बाळगितां आनी ताका साहित्यीक जिवितांत बरें यश मागतां.
– विन्सी क्वाद्रूस,
राय, साश्ट, गोंय.
मो. – ९८२२५८७४९८
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
