भांगरभूंय | प्रतिनिधी
येरादारी पुलिसांचे सतर्कतायेक लागून दुर्घटणा टळ्ळी
भांगरभूंय । प्रतिनिधी
म्हापशें: सोनारखेड आसगांवां वीज सरयांचो संपर्क जाल्ल्यान ट्रकांतल्यान हॉटेला खातीर व्हरपी तणाच्या खोपींक उजो लागलो. पूण येरादारी पुलिसांचे सतर्कतायेक लागून व्हड दुर्घटणा टळ्ळी. ट्रकांतल्यो सगळ्यो खोपी लाशिल्ल्यान सुमार 3 लाखांचें लुकसाण जालें.
ही घडणूक शेनवारा सकाळीं 10.15 वरांच्या सुमाराक घडली. तणाच्यो खोपी आशिल्लो जीए 03 के 9603 नंबराचो ट्रक रमेश मदार हो हणजूणें सावन मांद्र्यां वतालो. ताचे वांगडा कॅबिनांत आनीक कामगार आशिल्ले. मांद्रेंच्या एका हॉटेलाचे सजावटी खातीर ह्यो तणाच्यो 12 खोपी घेवन वतालो.
आसगांव सोनारखेड वाठारांत हो ट्रक पावलो तेन्ना वीज सरयो त्या खोपींक तेंकल्यो आनी तांकां उजो लागलो. उज्यान रोखडोच पेट घेतलो. हो प्रकार थंय तैनात आशिल्ल्या येरादारी पुलिसांचे नदरेक पडलो. त्या पुलिसांनी ट्रक चालकाक सतर्क केलो आनी ट्रक सुरक्षीत सुवातेचेर व्हेलो. थंयच्यान वचपी एका जेसीबीक पुलिसांनी आडायले आनी ताच्या आदारान ट्रकांतल्यो सगळ्यो खोपी भायर काडल्यो. ताका लागून ट्रक उज्याच्या धगा पासून वाटावलो.
येरादारी पुलीस सहाय्यक उपनिरिक्षक सखाराम वेंगुर्लेकार, समिना साळगांवकार, हवालदार मिलेश गांवस, कॉन्स्टेबल कल्पेश सोमजी आनी दीपक पेडणेंकार हांणी ही सतर्कताय दाखयली. म्हापशें उजो पालोवपी दळाच्या जवानांनी हो उजो पालयलो, पूण ते मेरेन सगळ्यो खोपींचो लासून गोबोर जाल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.