भांगरभूंय | प्रतिनिधी
भांगरभूंय । प्रतिनिधी
म्हापशेंः आसगांव हांगच्या केंद्रीय मंत्री स्मृती इराणी हिच्या सिली सोल्व ह्या कॅफे आनी बारा आड महिला काँग्रेसच्या निदर्शना उपरांत आयतारा युवक काँग्रेसान बार्रा भायर निदर्शना केलीं. अबकारी परवानो नूतनीकरण प्रकरणाची विशेश पंगडा वतीन चौकशी करची आनी हे बेकायदेशीरपणा खातीर इराणी हांचा राजिनामो घेवचो अशी मागणी युवक काँग्रेशीन केल्या.
आयतारा सकाळी काँग्रेसाचो म्हणयारो अमरनाथ पणजीकार आनी प्रदेश युवक काँग्रेस अध्यक्ष वरद म्हार्दोळकार हांच्या फुडारपणा खाला युवा समितीन ही निदर्शनां केलीं, बार्राक कुपूप लावपाची मागणी तांणी केली. ह्या वेळार चंदन मांद्रेकार, सुदीन नायक, अॅड शशांक नार्वेकार आनी हेर पदाधिकारी हाजीर आशिल्ले.
बार्राच्या गेटी भायर युवा काँग्रेसाच्या निदर्शकांक पुलिसांनी आडायलें. अबकारी खात्याच्या आयुक्तांनी ह्या बार्राक कारणां दाखय नोटीस धाडल्या. ते खातीर बार्राक कुलूप घालचे अशी मागणी करून तांणी कुलूप आनी चावी पुलिसांचे सुवादीन केली.
बार्राक कारणां दाखय नोटीस धाडपी अबकारी अधिकाऱ्याची सरकारान बदली केल्यार आमी ओगी रावचे नात अशी शिटकावणी वरद म्हार्दोळकार हांणी दिल्या. बेकायदेशीरपणान चलपी बार्राक संरक्षण दिवपाक पुलीस आयल्यात अशो थोमणो तांणी मारलो. मेल्ल्याच्या नांवान स्मृती इराणी अबकारी खात्या वतीन परवानो कसो मेळयलो हाची जाप दिवपाक जाय, अशें अमरनाथ पणजीकार हांणी सांगले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
