भांगरभूंय | प्रतिनिधी
दोन दिसांत 800 परस चड अर्ज, इत्सुकांक आयजूय संद
भांगरभूंय I प्रतिनिधी
पणजीः शिक्षण खात्यान आवाहन करून लेगीत 88 कंत्राटी शिक्षकांचे भरती खातीर जायत्या बीएड पदवी धारकांनी अर्ज केल्यात. पूण ही भरती फक्त डीएडधारकां खातीरूच आशिल्ल्यान खात्यान तांचे अर्ज स्विकारूंक नात. पात्र उमेदवारांक अर्ज करपाक बिरेस्ताराचो दिसूय दिला, अशी म्हायती शिक्षण संचालक शैलेश झिंगडे हांणी बुधवारा आमच्या प्रतिनिधी कडेन उलयतना दिली.
रजेर आशिल्ल्या 88 शिक्षकांचे सुवातेर कंत्राटी पद्दतीचेर नेमणूक करपाक शिक्षक खात्यान डीएड, डीएलएड आनी बीएलएड धारक उमेदवारांक गरजेच्या कागदपत्रां सयत आपापल्या म्हालाच्या शिक्षणाधिकाऱ्यां कडेन अर्ज करपाक सांगिल्लें. ते प्रमाण मंगळार आनी बुधवार ह्या दोन दिसांत 800 परस चड अर्ज खात्या कडेन आयल्यात. उमेदवारांची कुशळटाय चांचणीय घेतात.
हे भरती पसून पात्र उमेदवारांक नोकरी मेळची हे खातीर इत्सुकांक बिरेस्ताराचो दिसूय दिला. बिरेस्तार दनपार मेरेन कुशळटाय विकास चांचणी पुराय जाले उपरांत तीन वांगड्यांची निवड समिती पात्र 88 जाणांची वळेरी निश्चीत करतले. तांकां नोकरेंत रुजू जावपाची नेमणूक पत्रां दितलें.
ताका लागून सोमाराच्यान 88 कंत्राटी शिक्षक रजेर आशिल्ल्या शिक्षकांचे सुवातेर नवे शिक्षक रूजू जातलें, अशें संचालक झिंगडे हांणी सांगलें.
विवीध कारणांक लागून प्राथमीक शिक्षक कांय म्हयन्यां खातीर रजेर गेल्यात. ताचो विद्यार्थी आनी शिक्षणाचेर परिणाम जावचो न्हय हे खातीर हाचे मुखार अशा प्रकारान रजेर वचपी शिक्षकांचे सुवातेर कंत्राटी शिक्षकांची नेमणूक करतले.
— शैलेश झिंगडे, शिक्षण संचालक
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
