भांगरभूंय | प्रतिनिधी
युरी आलेमांव हांणी केली कारवायेची मागणी
पणजी ः वेळाच्या मर्यादे भायर मोठ्यान संगीत वाजयता म्हूण कागाळ करपाक पुलिशेंत गेल्ल्या हणजुणेच्या थळाव्या तरणाट्यांचेर क्लबकारांनी हल्लो केलो. हे गुंडगिरीचो हांव खर निशेध करतां. गोंयांतलें पुलीस दळ नायट क्लबाक घाणाक दवरलां काय कितें, हें पुलीस महासंचालकांनी स्पश्ट करचें आनी हल्लेखोरांचेर बेगोबेग कारवाय करची अशी मागणी विरोधी पक्ष फुडारी युरी आलेमाव हांणी केल्या. तांणी राज्यांत बेकायदेशीर नायट क्लब संस्कृतायेक आश्रय दिल्ल्या असो आरोप करून तांणी सरकाराचेर टिका केल्या.
हे घडणुकेक लागून थळाव्या गोंयकारांचेर जाल्ली भायल्या लोकांची गुंडगिरी परत एक फावट मुखार आयल्या. दर्यादेगेवेल्या वाठारांनी आयज सगळ्या तरांचे माफिया वावुरतात जे गोंय आनी गोमंतकीया खातीर सगळ्यांत व्हडलो धोको आसा, अशें युरी आलेमाव हांणी सांगलें. थळाव्या लोकांक व्हड आवाजाच्या संगीता आड कागाळी करपाक पुलिशेंत वचचें पडटा. सरकारी अधिकाऱ्यांक क्लबा आड कारवाय करपाक कोण आडायता असो प्रस्न युरी आलेमाव हांणी केला.
गोंयांत येवपी विदेशी पर्यटकांचे प्रमाण व्हड प्रमाणांत उणे जालां, हाचे वयल्यान राज्यांतली कायदो आनी सुवेवस्था इबाडिल्ल्याचें दिसता. ताका लागून पर्यटनाचेर वायट परिणाम आतां दिसपाक लागल्यात. अंदूं विदेशी पर्यटक सुमार 65 टक्क्यांनी उणे जाल्यात. गोंयांत येवपी दर्जेदार पर्यटक उणे जावपाक सरकार जापसालदार आसा असो गंभीर आरोप आलेमाव हांणी केला.
पुलीस महासंचालकांनी कसल्याच राजकी चेपणा खाला येनासतना कायद्याचें उल्लंघन करपी लोकांचेर खर कारवाय करची अशें आवाहन युरी आलेमावान केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
