आर्लेम स्पोर्ट्स क्लबाक वस्तादपण

भांगरभूंय | प्रतिनिधी

पोळे क्रिकेट क्लबाक 40 धांवड्यांनी हारोवन आर्लेम स्पोर्ट्स क्लबान 41वे नंदा लोलयेंकार करंड क्रिकेट सर्तीचें वस्तादपण जोडलें. माशें क्रिकेट क्लबान आयोजीत केल्ले सर्तीची फायनल दापट-माशेंच्या निराकार मैदानाचेर जाली.

आर्लेम क्रिकेट क्लबान पयलीं बॅटींग करतना 9 विकेटी वगडावन 225 धांवड्यो केल्यो. उपरांत पोळे क्लबाचो डाव 185 धांवड्यांचेर सोंपयलो. इनामां भेटवण सुवाळ्याक गोंय क्रिकेट असोसिएशनाचे अध्यक्ष विपूल फडके, सचीव रोहन गांवस देसाय, सर्तीचे मुखेल पुरस्कर्ते चिराग नायक, माशें क्रिकेट क्लबाचे पदाधिकारी हे उपस्थीत आशिल्ले.

थोडे भितर धांवतकटोः आर्लेम स्पोर्ट्स क्लब, 35 ओव्हरींनी 9 बाद 225 धांवड्यो (रजत शेट 36, प्रथमेश गांवस 29, साईश कामत 31, संकेत मोरजकार 30 धांवड्यो, शिवम आमोणकार 4-39, कृष्णन उन्नी 2-43) जैत आड पोळे क्रिकेट क्लब, 30.3 ओव्हरींनी सगले बाद 185 धांवड्यो (धीरज यादव 52, अरमान खान 30, अभिषेक धारवाडकार 23 धांवड्यो, रजत शेट 3-13, अचीत शिगवण 2-51, शेरबहादूर यादव 2-41).

वैयक्तीक इनामांः शुभम गजीनकार (उत्कृश्ट बॅट्समन), कृष्णन उन्नी (उत्कृश्ट बॉलर), रजत शेट (फायनलींतलो खेळगडो), शेरबहादूर यादव (सर्तींतलो उत्कृश्ट खेळगडो).