भांगरभूंय | प्रतिनिधी
मंदार सुर्लकार खून प्रकरणांतल्या आरोपींची याचिका भायरायली
पणजी: वास्कोच्या मंदार सुर्लकार खून प्रकरणांतले आरोपी रोहन पै धुंगट, नफियाज शेख, शंकर तिवारी आनी जोविता रायन पिंटो ह्या चवगांक जल्मठेपीची ख्यास्त दिल्या. ह्या आरोपींनी बंदखणींतली 14 वर्सा पुराय करूंक नाशिल्ल्याचें निरिक्षण नोंद करून मुंबय उच्च न्यायालयाच्या गोंय खंडपिठान आरोपींक रोखडीच सुटका करपाक न्हयकार दिवन याचिका भायरायल्या. हे विशींचो निवाडो न्या. महेश सोनक आनी न्या. आरएन लड्ढा ह्या दोन वांगडी खंडपिठान काल (बुधवारा) जारी केलो.
वास्कोच्या मंदार सुर्लकार हाचें 14 ऑगस्ट 2006 दिसा अपहरण करून ताच्या बापाय कडल्यान 50 लाख रुपया उबारप अशें आरोपी रोहन पै धुंगट, नफियाज शेख, शंकर तिवारी, जोविता रायन पिंटो आनी अल सलेटा बेग हांणी नियोजन केल्लें. उपरांत फोंड्यां आर्ला-केरी हांगा मंदराची हात-पांय बांदिल्ले अवस्थेंतली कूड सांपडिल्ली. ह्या प्रकरणांत पुलिसांनी सगल्या पांचूय दुबावितां आड भादंसंच्या कलम 120 (बी), 364, 302 आनी बाल कायद्याचें कलम 8 प्रमाण गुन्यांव दाखल करून बाल न्यायालयांत आरोपपत्र दाखल केल्लें. ह्या प्रकरणांत न्यायालयान 23 जून 2014 दिसा चारूय आरोपींक तिट्टी जल्मठेपेची ख्यास्त दिल्ली, जाल्यार अल सलेहा बेग हो माफिचो साक्षिदार जाल्ल्यान ताची सुटका केल्ली. हे ख्यास्तीक सगल्या आरोपींनी मुंबय उच्च न्यायालयाच्या गोंय खंडपिठांत आव्हान दिल्लें. खंडपिठान 4 मार्च 2019 दिसा चवगांकूय तिट्टी जल्मठेपेची ख्यास्त कायम दवरिल्ली.
त्या वेळार मंदार सुर्लकार हाच्या बापायन आरोपींक फांशीची ख्यास्त दिवपाचो दाखल केल्लो अर्ज खंडपिठान भायरायिल्लो. उपरांत 18 सप्टेंबर 2020 दिसा जाल्ले बसकेंत राज्य शिक्षा पुनरावलोकन मंडळान ह्या प्रकरणांतल्या चारूय आरोपींक रोखडीच सुटका करपा खातीर मंजुरी दिवन राज्य सरकारा कडेन प्रस्ताव धाडिल्लो.
सरकारान बाल न्यायालयाची बाजू मागिल्ली, ते प्रमाण बाल न्यायालयान 5 मार्च 2021 दिसा आपले मत नोंद करून सगल्या आरोपींची रोखडीच सुटका करपाक न्हयकार दिलो. हाची दखल घेवन राज्य सरकारान 10 मे 2021 दिसा आदेश जारी करून आरोपींक रोखडीच सुटका करपाक न्हयकार दिलो. वयल्या दोनूय आदेशांक आरोपींनी खंडपिठांत आव्हान दिल्लें.
मंदार सुर्लकाराच्या बापायन विरोध करून ज्या वेळार शिक्षा पुनरावलोकन मंडळान आरोपींची सुटका करपाचो प्रस्ताव मंजूर केलो त्या वेळार तांची 14 वर्सांची ख्यास्त जावंक नाशिल्ल्याचो दावो करून मंडळान नेमाचें उल्लंघन करून मंजुरी दिल्ल्याचो दावो केल्लो. हाची दखल घेवन खंडपिठान बंदखण म्हानिरिक्षका कडल्यान आरोपीची म्हायती मागिल्ली.
ते प्रमाण 18 सप्टेंबर 2020 दिसा पॅरोल, फर्लो आनी माफीचो काळ सोडून आरोपी रोहन पै धुंगट हाका 11 वर्सां 2 म्हयने 17 दीस, नफियाज शेख 11 वर्सां 9 म्हयने 16 दीस, शंकर तिवारी 12 वर्सां 6 म्हयने 5 दीस जाल्यार जोविता रायन पिंटो हाका 12 वर्सां 1 म्हयनो 24 दीस वास्तवीक ख्यास्त जाल्ल्याची म्हायती खंडपिठांत सादर केल्ली.
राज्य सरकारा वतीन सहाय्यक सॉलिसिटर जनरल प्रवीण फळदेसाय हांणी सरकाराची जाल्यार अॅड. दीपक गांवकार हांणी मंदाराच्या बापायची बाजू मांडून वयली म्हायती उखलून धरली जाल्यार आरोपीच्या वकिलान शिक्षा पुनरावलोक मंडळान दिल्ल्या निर्णया प्रमाण बेगीन सुटका करपाची मागणी केली. उपरांत खंडपिठान चारूय आरोपींची 14 वर्सांची बंदखण पुराय जावंक नाशिल्ल्याचें निरिक्षण नोंद करून सुटका करपाक न्हयकार दिलो.
हाचे बगर 14 वर्सांची ख्यास्त पुराय जाले उपरांतूच शिक्षा पुनरावलोकन मंडळान ताचो विचार करपाचो तशेंच बाल न्यायालय आनी हेर प्राधिकरणान कायदेशीर निर्णय घेवपाचो निर्देश जारी केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
