आरबीएल बँकेक 9.24 लाखांची तोपी घालप्याक अटक

भांगरभूंय | प्रतिनिधी

भांगरभूंय I प्रतिनिधी
म्हापशेंः आरबीएल बँकेच्या एटीएम मशिनाचे नेटवर्क हॅक करून 9.24 लाखांची चोरी घालपी दुबावीत मुबारकदीन मोहम्मद (मेवात हरियाना) हाका सायबर गुन्यांव फांट्यान अटक केल्या.
नेटवर्क हॅक करून चोरयेचो हो प्रकार 5 आनी 6 ऑक्टोबर 2022त घडिल्लो. आरबीएल बँकेच्या गोंयांतल्या पणजी, म्हापशें, कळंगूट आनी मडगांवांतल्या एटीएम मशिनाचो नेटवर्क हॅक करून दुबावितान एटीएमांतल्यान 9.24 लाख रुपयांची चोरी केल्ली.
ह्या प्रकरणांत गुन्यांव फांट्याच्या सायबर विभागान बँकेच्या मुंबय दक्षता विभागाचे सहाय्यक उपाध्यक्ष विक्रांत कदम हांचे कागाळेच्या आदारान अनवळखी डेबीट कार्डधारका आड गुन्यांव नोंद केल्लो.
दुबावितान वयल्या एटीएम मशिनाचे नेटवर्क हॅक करून 28 डेबीट कार्डांच्या आदारान 9.24 लाख रुपया काडून ही चोरी
केल्ली.
चवकशे वेळार सायबर विभागाक दुबाविताची म्हायती मेळिल्ली. पूण तो आपली सुवात बदलीत रावतालो. दुबावीत आरोपी मेवान हरियाणांत आशिल्ल्याची म्हायती सायबर गुन्यांव फांट्याक मेळिल्ली. ते प्रमाण पुलीस पंगडान हरियाणांत वचून दुबाविताक अटक केली.
पुलीस अधिक्षक शिवेंद्र भूषण हांच्या मार्गदर्शना खाला निरिक्षक देवेंद्र पिंगळे, हवालदार योगेश खांडेपारकार, कॉन्स्टेबल संयोग शेट्ये, इब्राहीम करोल, विनय आमोणकार आनी हेमंत गांवकार ह्या पंगडान ही येसस्वी कामगिरी केली.