भांगरभूंय | प्रतिनिधी
पुलीस सीसीटीव्ही फुटेजीचो घेतात आदार
ओर्डा – कांदोळे खून प्रकरण
म्हापशें: ओर्डा-कांदोळे धारेचें हत्यार तोपून खून जाल्लो मयत आरनाल्डो सुवारीस (69) हांच्या खुनाचे धागेदोरे अजून सांपडिल्ले नात. पुलीस कांदोळी ते सिकेरी मजगतच्या सीसीटीव्ही फुटेजीच्या आदारान दुबाविताचो सोद घेतात. गाडी व्हरून पळ काडपी दुबावीत एका सीसीटीव्हींत दिसता. पूण उटगंराच्या पावसाक लागून ताचो चेरो वेवस्थीत दिसना. तंत्रीक गजालींच्या आदाराचेर ह्या प्रकरणाचो तपास लावपाचो यत्न कळंगूट पुलीस करतात.
मयताचेर फाटल्यान दुबावितान हो हल्लो केलो. मयताचे फाटीर, गळ्या सकयल धारेच्या हत्यारान वार केले. पांच, स वाराचे घावे फाटीर पुलिसांक दिसून आयल्यात. घराचे भितरले कुडींत दुबावितान मयत सुवारीस हांचेर हल्लो करून तांची हत्या केले उपरांत तांकां ताणें ओडीत भायले कुडीत हाडले आनी उपरांत दुबावितान घरांतली तांचीच मोटार घेवन पळ काडिल्लो.
कळंगूट पुलिसांनी ओर्डा – कांदोळी ते आग्वाद सिकेरी हॅलिपॅडा कडेन वचपी रस्त्या वेल्या सगल्या आस्थापनांच्यो सीसीटीव्ही फुटेजी तापसल्यो. एक दोन फुटेजींत दुबावीत आरोपी मयताची मोटार घेवन वचत आशिल्ल्याचें दिसून येता. चडशे सीसीटीव्ही कॅमेरे बंद आसात. वा ते वेवस्थीत चलनात अशें दिसून आयलें. दुबावीत मोटारींत एकलोच दिसून येता. ताका लागून ताणें एकल्यानूच सुवारीस हांचो खून केलो आसुये असो अदमास पुलीस उक्तायतात.
फुडलो तपास पुलीस अधिक्षक अक्षत कौशल आनी उपअधिक्षक विश्वेश कर्पे हांच्या मार्गदर्शना खाला निरिक्षक परेश नायक करतात.
मयत आरनाल्डो सुवारीस हे मूळ गोंयकार आनी अनिवासी भारतीय नागरीक आशिल्ले. तांणी कॅनडाचें नागरिकत्व स्विकारिल्लें. ते कॅनडियन नागरीक आशिल्ल्यान तांचे कुडीची मरणा उपरांतची तपासणी करपाक गोमॅकाँतल्या दोतोरांनी असमर्थताय दाखयली आनी कॅनडा दुतावासा कडल्यान परवानगी हाडपाची सुचोवणी केली. ते प्रमाण पुलिसांनी विदेशी नागरीक नोंदणी अधिकारी (एफएफआरओ) कचेरे वतीन कॅनडा दुतावासा कडेन परवानगी अर्ज सादर केला आनी थंय सावन मान्यताय मेळ्ळे उपरांत मयताचे कुडीचेर मरणा उपरांतची तपासणी जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
