भांगरभूंय | प्रतिनिधी
भांगरभूंय । प्रतिनिधी
म्हापशेंः भाजपा सरकार पंतप्रधान नरेंद्र मोदी हांच्या गॅरंटीच्यो बडायो मारता. जर मोदी हाणे दरेका गोंयकाराक हक्काचें घऱ, 300 चौखणी मीटर जमीन ना जाल्यार फ्लॅट दिवपाची गॅरंटी दिल्यार रिव्होल्युशनरी गोवन्स (आरजी) पक्ष भारतीय जनता पक्षांत विलीन करून भाजपांत प्रवेश करपाचें पक्षाचो सर्वेसर्वा मनोज परब हाणे म्हापश्या मंगळारा पक्षा वतीन आयोजीत केल्ले अस्तित्व सभेंत उलयतना जाहीर केलें.
गोंय मुक्ती दिसा सांजे आयोजीत केल्ले हे बसकेंत आरजीपीन लोकसभे खातीर उत्तर आनी दक्षीण गोंय ह्या दोनूय मतदारसंघांतल्यान आपले उमेदवार जाहीर केले. उत्तरेत स्वता मनोज परब आनी दक्षीणेंत रुबर्ट परेरा व्हो पक्षाचो उमेदवार आसतलो. सभेक पक्षाचो सान्तआंद्रेचो आमदार विरेश बोरकार, पक्ष पदाधिकारी आनी समर्थक व्हडा संख्येन हाजीर आशिल्ले. आरजी पक्ष व्हो खंयच्याय राजकी पक्षाची बी टीम न्हय, आमी मतांची विभागणी करपाक आयले नात. प्रादेशीक पक्षाची हक्काचीं आशिल्लीं मता घेवपाक आमी वेंचणूक रिंगणात देंवल्यात अशें परबान स्पश्ट केलें.
आरोप पुराव्यान सिद्ध करात
विरोधक आरजीचेर आनी म्हजेर वैयक्तीक आरोप करतात. कांय जाण म्हजे कडेन बीएमडब्ल्यू, ऑडी, मर्सिडीज ह्यो गाडयो आनी बंगलो आसा असो दावो करतात. हें कागदपत्री पुराव्यान सिद्ध करून दाखोवपाचें आव्हान परब हाणे विरोधकांक दिलां. जर ताणी हें सिद्ध करूनदाखयल्यार ताच्या खिणाक आपूण आरजी पक्ष बंद करतलों अशेंय ताणे जाहीर केलें. म्हजे कडेन व्हडलो बंगलो आसा अशें कांय जाण सांगतात पूण हांव भाड्याच्या फ्लॅटांत रावतां आनी ताचें भाडें भर म्हणसर म्हाका घाम फुटता. म्हाका पय़शेच जोडपाचे आशिल्ले जाल्यार इतले म्हणसर कोट्यांनी रुपया जमोवन हांव विदेशांत स्थायीक जालो आस्ताशिलो. म्हाका आनी आरजीवाल्यांक सेटलमेंटा खातीर व्हडल्यो ऑफरी येतात पूण आमी क्रांतीकारी आसात आनी पयशाचें भिके खातीर राजकारणात आयले नात. आमकां गोंयच्यो जमनी फुडले पिळगे खातीर राखून दवोरपाच्यो आसात अशें परबान सांगलें.
आरजी पक्षाक विदेशांतल्यान व्हडा प्रमाणांत देणग्यो मेळटात. त्या पयशांतल्यान आरजीवाले मजा मारतात अशें आरोप जातात. दरेक फावट आमी पशय़ांचो हिशेब वा स्पश्टिकरण दिवपाक शकनात. आमी आमच्या सगल्या अर्थीक वेव्हाराची म्हायती पक्षाच्या बेवसायटीचेर वेळोवेळ अपटेट करतात अशें ताणे सांगलें. भाजप वा काँग्रेस पक्षाक गोंयच्या अस्तित्वा कडेन कांय देणे-घेणे ना. राज्यांतल्या जमनीची राखण करपा खातीर तांणी कायदो केलो ना. भायल्यांनी येवंन हांगा जमनी घेतल्यो. पंतप्रधान आनी गृहमंत्री पोर्तुगेजां परस चड हुकूमशहा आसात असो गंभीर आरोप परबान केलो.
भाजपा विरोधी पक्षांनी एकठांय येवन इंडिया आघाडी स्थापन केल्या. ह्या आघाडीचे कांय सहयोगी आमकां रस्यार येवंन मेळपाक सांगतात. तांणी आमकां उपचारीक मेल वा संदेश धाडपाची गरज आशिल्ली. फाटल्या कांय वर्सां सावन काँग्रेस आनी आम आदमी पक्ष आमकां भाजपाची बी टीम समजतात. मागीर आमची तांका कसली गरज आसा. उरफाटें काँग्रेस पक्ष म्हणल्यार भाजपाक आयते आमदार पुरोवपी कारखानो आसा अशी टिका मनोज परब हाणे केल
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
