‘आय हॅव इलेक्ट्रीक ड्रीम्स’ चित्रपटाक भांगरा मोर

भांगरभूंय | प्रतिनिधी

तेलगू अभिनेतो चिरंजीवीक ‘पर्सनालिटी ऑफ द इयर’ पुरस्कार

• इफ्फीचो समारोप
• पणजी : संवसारभरांतल्या विवीध भाशांतल्या चित्रपटांची रसिकांक मेजवानी दिवपी आंतरराष्ट्रीय चित्रपट महोत्सवाचो (इफ्फी) रंगारंग समारोप सोमारा जालो. समारोपाच्या सुवाळ्यांत ‘आय हॅव इलेक्ट्रीक ड्रीम्स’ चित्रपटाक प्रतिश्ठेचो भांगरा मोर पुरस्कार फावो जालो. तेलगू अभिनेतो चिरंजीवी हांकां ‘पर्सनालिटी ऑफ द इयर’ पुरस्कार फावो जाला. आशा पारेख, अक्षय कुमार, आयुषमान खुराणा, प्रसनजीत चटर्जी ह्या कलाकारांचोय समारोप सुवाळ्यांत भोवमान जालो.
• क्रिएटीव्ह यंग मायडस ऑफ इंडिया, गोंयां खातीर खासा मास्टर क्लास, तंत्रज्ञान तशेंच सुटके झुजाचेर आदारीत प्रदर्शन, कार्नावाल आनी शिगमो परेड हाका लागून 53वो इफ्फी यादगार जालो. पोलंडच्या ‘पर्फेक्ट नंबर’ चित्रपटान इफ्फीचो समारोप जालो. इफ्फीच्या समारोपाक लागून फाटल्या णव दिसांचो झगमगाट आनी रंगारंग वातावरणाचोय समारोप जाला.
• पुराय गोंय हीच फिल्मसीटी : मुख्यमंत्री
• सोबीत दर्यादेगो, सैम आनी आदरातिथ्याक लागून पुराय गोंय हीच एक फिल्मसीटी आसा. चित्रपट महोत्सव आनी चित्रपट प्रतिनिधी हांचें नाते दिसान दीस घटमूट जायत आसा, अशें मुख्यमंत्री डॉ. प्रमोद सावंत हांणी सांगलें. चित्रपट महोत्सवा निमतान चित्रपट प्रदर्शनां खेरीत तरेकवार कार्यावळी जाल्यो. प्रतिनिधी सयत अदमासे 12 हजार लोकांनी चित्रपट महोत्सवाचो आस्वाद घेतलो. ‘वसुधैवम कुटुंबकम’ ही भारताची संस्कृती. ह्या संस्कृतीचे दर्शन चित्रपट महोत्सवांतल्यान घडटा. ह्या महोत्सवाक लागून आशा पारेख, चिरंजीवी सारक्या स्टार कलाकारांनी गोंयांक भेट दिली. प्रधानमंत्री नरेंद्र मोदी हांचे फुडारपणा खाला देशाची नेटान उदरगत जायत आसा. भारतीयांच्या काळजात प्रधानमंत्री मोदी हांणी सुवात मेळयल्या, अशें मुख्यमंत्री डॉ. प्रमोद सावंत हांणी सांगलें.
• भारतांत ‘जी 20’ परिशद जातली. गोंयांत आयुर्वेदीक काँग्रेसी सयत ‘पर्पल महोत्सव’ जावपाचो आसा, अशें मुख्यमंत्री डॉ. प्रमोद सावंत हांणी सांगलें.
• नो एण्ड दिग्दर्शक नादेर साईवार हांका रूप्या मोर इनाम
• भांगरा मोरा सयत रुप्या मोर तशेंच खासा परिक्षक मंडळ पुरस्काराची घोशणा जाली. मानेस्तां हस्तुकीं पुरस्कारांचें वांटप जालें. व्हॅलेंटिना मॉरेल दिग्दर्शीत ‘आय हॅव इलेक्ट्रीक ड्रीम्स’ ह्या स्पेनच्या चित्रपटाक भांगरा मोर पुरस्कार फावो जालो. इराणचे दिग्दर्शक नादेर साईवार हांकां ‘नो एण्ड’ चित्रपटा खातीर रुप्या मोर पुरस्कार फावो जालो. जाल्यार सर्वोत्कृश्ट अभिनेत्या खातीरचो पुरस्कार वाहीद मोबस्सेरी हांकां ‘नो एण्ड’ चित्रपटा खातीर फावो जालो.
• सर्वोत्कृश्ट अभिनेत्री खातीरचो रुप्या मोर पुरस्कार ‘आय हॅव इलेक्ट्रीक ड्रीम्स’ची अभिनेत्री डॅनिएला मारिन नवारो हिका फावो जालो. फिलीपीन चित्रपट निर्माते लव्ह डियाझ हांकां ‘व्हेन द व्हेवज आर गॉन’ चित्रपटा खातीर खासा परिक्षक पुरस्कार फावो जाला. पदार्पणांतल्या सर्वोत्तम दिग्दर्शका खातीरचो पुरस्कार असिमिना प्रोडू हांकां बिहाइंड द हेस्टॅक्स चित्रपटा खातीर फावो जालो. ‘सिनेमाबंदी’ ह्या तेलगू चित्रपटा खातीर प्रवीण कांड्रेगुला हांकां खासा उल्लेखनीय पुरस्कार मेळ्ळो.
• नर्गेसी चित्रपटाक युनेस्को गांधी पदक फावो जाले.
• भारतीय चित्रपट पुराय संवसारांत पावयतले: केंद्रीय मंत्री ठाकूर
• प्रादेशीक चित्रपट आतां राषट्रीय पांवड्यार पावल्यात. दर्जेदार आशय आसत जाल्यार चित्रपट संवसारांत पावतात आनी तांची तोखणाय जाता, अशें केंद्रीय म्हायती आनी प्रसारण मंत्री अनुराग ठाकूर हांणी सांगलें. चित्रपट महोत्सवांत तरेकवार भाशांतले दर्जेदार चित्रपट प्रदर्शीत जाले. हाका लागून प्रतिभा आनी कलेचे दर्शन महोत्सवांत घडलें. भारत आयज तंत्रज्ञानाचो केंद्रबिंदू थारला. तंत्रज्ञानाच्या आदाराचेर भारतीय चित्रपट संवसारांत पावपाचे हाचे मुखार लेगीत यत्न जातले, अशें ठाकूर हांणी सांगलें.
• देशांत एक सुसज्ज चित्रीकरण परिसंस्था आनी फुडारा खातीर उद्देग उबारपाचे आमचें उद्दिश्ट आसा. सिनेमा मदीं नवी प्रतिभा येत आसा. मोबायल, ओटीटी तशेंच थिएटरांत वचून लोक सिनेमा पळयतात. डिजीटल इंडिया मोहिमेक लागून चित्रपट निर्मितीक लेगीत गती मेळ्ळ्या, अशें तांणी सांगलें.
• भारत आनी इस्रायल हांचे खाशेले नातें आसा. इस्रायल सयत देश बऱ्याच वाठारांत एकठांय वावर करता. चित्रपट निर्मितीत इस्रायल वांगडा नवी भागीदारी सुरू जातली, अशें केंद्रीय मंत्री अनुराग ठाकूर हांणी सांगलें.
• चित्रपट हो भ्रश्टाचारमुक्त वेवसाय : चिरंजीवी
• चित्रपट हो भ्रश्टाचारमुक्त वेवसाय. चित्रपट सोडून हांव राजकारणांत गेल्लो. आतां परत चित्रपटांत आयलां. चित्रपटांनी म्हाका बरेच कितें दिलां. आतां आपूण सेगीत चित्रपटांनी आसतलों, अशें सुपर स्टार चिरंजीवी हांणी सांगलें. पर्सनालिटी ऑफ द इयर पुरस्कारान चिरंजीवी हांचो भोवमान जालो.
• ‘दिल देके देखो’ चित्रपट यादींत उरतलो : आशा पारेख
• ‘दिल देके देखो’ हो म्हजो पयलो चित्रपट. हो चित्रपट म्हजें सदाच यादींत उरतलो. दिपीका पदुकोण ही अभिनेत्री आपणाक खूब आवडटा, अशेंय आशा पारेख हिणें सांगलें.
• दर वर्सा गोंयांत येता : अक्षय कुमार
• गोंयांत म्हजें ल्हानशें घर आसा. दर वर्सा हांव गोंयांत येता. अंदूं लेगीत नव्या वर्साक गोंयांत येतलों. सगल्यांक गोंय आवडटा, अशें अक्षय कुमार हांणी सांगलें.