भांगरभूंय | प्रतिनिधी
भांगरभूंय । प्रतिनिधी
मुरगांवः बायणा वास्को हांगच्या वाल्मिकी बिल्डिंगेचे तळ माळयेर आशिल्ल्या आयडीबीआय बँकेच्या एटीएमांतल्यान पयशे काडिल्ल्यान दिवाळी फुलयली. एटीएमांतल्यान 5 हजार रुपये काडपाक गेल्यार साडेबारा हजार आनी 2 हजार काडल्यार साडेपांच हजार रुपये येवपाक लागलें. ही गजाल एटीएम कार्डधारकां मदीं पातळ्ळ्या उपरांत तांणी पयशे काडपाक एटीएमा लागीं गर्दी केली. बँक अधिकारी आनी पुलिसांक ही खबर मेळटगीर तांणी एटीएम मशीन बंद केलें. बायणा वाठारांतल्या जायत्या जाणाक दोबराद पयशें मेळिल्ल्याचें सांगतात.
मेळिल्ले म्हायती प्रमाण ह्या एटीएम मशिनाचे पांचशें, दोन हजार, आनी शंबर रुपयांचे ट्रेंत पयश्यांच्यो नोटी सारक्यो दवरूंक नाशिल्ल्यान मशिनांतल्यान पयशे काडटता एटीएम कार्ड धारकांक तांणी मागिल्ले रक्कमे परस चड पयशे येवपाक लागले. कांय जाणांनी हाचो फायदो घेवन दोन तीन फावट मशिनांतल्यान पयशे काडले. चड पयशे येतात ही खबर पातळटगीर लोकांनी पयशे काडपाक गर्दी केली. पयशे काडपाक लोकांची रांग लागल्या हाची म्हायती मेळटगीर बँक अधिकाऱ्यांनी वास्को पुलिसांक ताची खबर दिली. उपरांत तांणी येवन मशीन बंद केलें.
बँकेच्या कर्मचाऱ्यांनी एटीएम मशिनाची तपासणी केली तेन्ना 100, 200, 500 आनी 2000 रुपयांच्यो नोटी दवोरपाच्या ट्रेंत मशिनांत पयशें घातिल्ल्यांनी नोटांची अदलाबदल केल्ल्यान कार्डधारकांक चड पयशे मेळपाक लागले. शंबर रुपयांचे ट्रेंत पांचशें, दोनशेंच्या ट्रेंत 2 हजार रुपयाच्यो नोटी दवोरल्ल्यान मशिनांतल्यान चड पयशे येवपाक लागले. ज्या कार्डधारकानी दोन तीन फावट पयशे काडल्यांत तांकां ते बँकेक परत दिवचे पडटले अशें पुलीस सूत्रांनी सांगलें. ह्या एटीएम मशिनाचे कुडींत सीसीटीव्ही कॅमेरा आशिल्ल्यान कोणे कितले फावट पयशे काडल्यान हें पळोवन तांचे कडल्यान तांका मेळिल्ले चड पयशे वसूल करतले अशें तांणी सांगलें. ज्या कार्डधारकांच्या बँक खात्यांत पशये आसात तांचे खात्यांतल्यान पयशे वजा जातले. हेरांक मात बँकेक पयशे दिवचे पडटले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
