भांगरभूंय | प्रतिनिधी
रोहन खंवटेः केंद्रीय आयटी मंत्र्यां कडेन केली उलोवणीं
भांगरभूंय । प्रतिनिधी
पणजीः गोंयचे पर्यटन आनी म्हायती तंत्रगिन्यान (आयटी) मंत्री रोहन खंवटे हांणी नवी दिल्लींत केंद्रीय म्हायती आनी तंत्रगिन्यान मंत्री आश्विनी कुमार वैष्णव हांची भेट घेवन गोंयांतल्या आयटी उद्देगा विशीं तांचे कडेन भासाभास केली. गोंयांत व्हडा प्रमाणांत आयटी उद्देग आयल्यार गोंयां खातीर ते एक वरदान थारतलें अशें तांणी वैष्णव हांकां सांगलें.
खंवटे हांणी गोंयांतल्या आयटी मळाचे उदरगती विशीं भासाभास केली. राज्य सरकारान हातांत घेतिल्ल्या आयटी प्रकल्पांची तशेंच आयटी मळाक उर्बां दिवपा खातीर राज्य सरकारान घातिल्ल्या पावलांची खंवटे हांणी वैष्णव हांकां म्हायती दिली. गोंयांत आयटी मळार आशिल्ल्यो गुंतवणुकीच्यो संद आनी ताका लागून तयार जावपी रोजगार हे विशीं दोनूय मंत्र्यांनी खोलायेन चर्चा केली. आयटी उद्देग सुरू करपा खातीर गोंय हें एक आदर्श थळ आसा अशें खवंटे हांणी सांगलें.
आयटी उद्देगांक गुंतवणुके खातीर दितले उर्बाः केंद्रीय मंत्री
आश्विनी कुमार वैष्णव हांणी गोंयांत सुरू आशिल्ल्या आयटी प्रकल्पांची खंवटे हांचे कडल्यान म्हायती घेतली. गोंयांतल्या तीन दर्यादेगांनी सुरू केल्ल्या ‘वर्केशन गोवा’ ह्या उपक्रमाची म्हायती खंवटे हांणी वैष्णव हांकां दिली. गोंयांत आयटी उद्देगांतले गुंतवणुकेक उर्बां दिवपा खातीर केंद्रीय आयटी मंत्रालया वतीन यत्न करपाचें उतर वैष्णव हांणी आपल्याक दिलां अशें खवंटे हांणी बसके उपरांत पत्रकारांक सांगलें. गोंय हे आयटी हब करपा खातीर गांवगिऱ्या वाठारांत लेगीत कनेक्टिव्हिटीचो प्रस्न सुटावो करतले अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
