भांगरभूंय | प्रतिनिधी
आपत्कालीन यंत्रणा सावध
29 मे मेरेन मॉम्सूनपूर्व पावस
दोन दीस रॅड अलर्ट
भांगरभूंय । प्रतिनिधी
पणजी : गोंय हवामान विभागान फुडले दोन दीस नेटाचो उटंगार जाल्यार ते उपरांतचे चार दीस उटंगाराच्या पावसाचो अदमास उक्तायला. ताका लागून गोंयची आपत्कालीन यंत्रणा लेगीत सतर्क जाल्या. फाटल्या तीन दिसां वरीच शुक्रारा लेगीत गोंयांतल्या विवीध वाठारांनी उटंगाराच्या पावसान हाजेरी लायली. ताका लागून कांय वाठारांनी पडझडीच्यो किरकोळ घडणुको घडल्यो.
हवामान विभागाच्या अदमासा प्रमाण मॉन्सूनपूर्व पावसान फाटल्या मंगळारा सावनूच गोंयांत धुमशेण कांडलां. बुधवारा आनी बिरेस्तारा पडिल्ल्या नेटाच्या उटंगाराच्या पावसाक लागून बार्देस, दिवचल, सत्तरी ह्या म्हालांनी व्हड प्रमाणांत पडझडीच्यो घडणुको घडून, शेतांचेंय कोट्यांनी रुपयांचें लुकसाण जालां. मॉन्सूनपूर्व पावस 29 मे मेरेन कायम उरपाचो अदमास हवामान विभागान उक्तायला आनी सेगीत तीन दीस ‘रॅड अलर्ट’ जारी केला. सोमारा आनी मंगळारा ‘ऑरेंज’, जाल्यार बुधवारा आनी बिरेस्तारा ‘यलो अलर्ट’ दिला. ते उपरांत तीन ते चार दिसांनी गोंयांत मॉन्सूनाचो पावस दाखल जावपाची शक्यताय आसा. ताका लागून फुडले कांय म्हयने गोंयाक पावसाचो झोड सोंसचो पडटलो.
शुक्रारा दीसभर कांय वाठारांनी उटंगाराचो जाल्यार कांय वाठारांनी तुरळक पावसाची नोंद जाली. घोग्यांनी पडपी पावसाक लागून शुक्रारा 23 मेक फांतोडेर 5 वरांचेर आडपय पंचायती लागसार अतूल आनी अनुप नायक मुळे हांच्या घराचेर कुमयाच्या व्हड झाडा वांगडाच भेणयेचीं दोन झाडां हुमटून पडलीं. हाका लागून घराचे सुमार दोन ते तीन लाख रुपयांचें लुकसाण जालां, असो अदमास आसा. आदली सरपंच तशेंच सध्याची पंच क्षिप्रा मशाल आडपयकार आनी अनूप नायक मुळे हांचें हें संयुक्त घर. पावसाक लागून कामरखण-दाभाळच्या शाली नायक हांच्या घराचेर झाड पडून घराचें लुकसाण जालें. मडगांवां गांधी मार्केटा लागसार पोरण्या बँक ऑफ बडोदाचे इमारतीच्या स्लॅबाचो भाग कोसळून तीन गाडयांचें लुकसाण जालें. कांपाल-पणजे काम चालू आशिल्ले इमारतीचे कुशीचो रस्तो नेमलो. अशे तरेच्यो घडणुको गोंयांतल्या हेर वाठारांनीय घडल्यात.
आपत्कालीन नंबर जारी
हवामान विभागान फुडले तीन दीस गोंयांत पावसाचो रॅड णलर्ट जारी केल्ल्यान प्रशासन सतर्क जालां. आपत्कालीन परिस्थितींत लोकांनी 0832- 2419550, 0832- 2225383, 0832- 2794100 वा 112 ह्या नंबराचेर संपर्क करचो, असो उलो जिल्होधिकाऱ्यान मारला. दोनूय जिल्होधिकाऱ्यांनी तत्काळ बसका घेवन, खबरदारीच्यो सगळ्या उपाय येवजण्यां संबंदांत अधिकाऱ्यां कडेन चर्चा केली.
मडगांवां इमारतीचो भाग कोसळ्ळो
मडगांव : मडगांव गांधी मार्केटा लागसारच्या आदल्या बँक ऑफ इंडियाचो फांटो आशिल्लो, ते इमारतीचो कांय भाग पावसाक लागून कोसळ्ळो. हातूंत पार्क करून दवरिल्ल्या तीन गाडयांचें लुकसाण जालें. तातूंतले एके गाडयेंत बशिल्लो चलो वाटवलो. अतिरिक्त जिल्लोधिकारी, आमदार हांच्या पळोवणे उपरांत मोडपाक आयिल्लो भाग काडून ही इमारत सील करपाचे निर्देश दिल्यात. आमदार दिगंबर कामत हांणी सांगलें, इमारतीचो धोको निर्माण करपी भाग गॅस कटरा वरवीं काडटले. रस्तो येरादारी खातीर आनी पार्किंगा खातीर बंद करून फकत चलत वचप्यां खातीर एके वटेन चालूच दवरतले. स्ट्रक्चरल ऑडीट करतले, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
