भांगरभूंय | प्रतिनिधी
आयज पुलीस स्थापना दीस
पणजी : २० डिसेंबराक गोंय पुलीस आपलो ६२वो स्थापना दीस मनयतात. आयजच्या दिसाच १ जानेवारी ते १७ डिसेंबर २०२३ ह्या काळांत पुलिसांनी केल्ले उत्कृश्ठ कामगिरीचो आंकडो मुखार आयला. उत्तर आनी दक्षीण गोंयच्या पुलिसांनी अंदूं गुन्यांव तपासांत बरी कामगिरी केल्ल्याचें समजलां. १ जानेवारी ते १७ डिसेंबर २०२३ ह्या काळांत जाल्ल्या गंभीर गुन्यांवां मदले ९७.१४ टक्के गुन्यांव तपासांत पुलिसांक येस आयलां.
ही कामगिरी पुरायेन पुलीस दळाची जावन आसा. हातूंत बायलां पुलीस, गुन्यांव शाखा, कोकण रेल्वे, घुवळे वखदां विरोधी पंगडाचो आसपाव ना.
ह्या काळांत गोंयांत खुनांचे २४ गुन्यांव नोंद जाल्ले. तांतल्या २३ गुन्यांवांचो तपास लावपाक पुलिसांक येस आयलां. बलात्काराच्या ९१ मदल्या ८८, जीव घेवपी २५ मदल्या २५ गुन्यांवांचो तपास लागला. गुन्यांवांचो तपास लावपाची टक्केवारी ९७.१४ इतकी आसा.
वयल्या काळांत राज्यांत भारतीय दंड विधान संहितेच्या विवीध कलमां खाला १ हजार ८८२ गुन्यांव नोंद जाल्ले. तांतल्या १ हजार ६१४ गुन्यांवांचो येसस्वीपणान तपास लागला. हातूंत पॉक्सो, बाल लैंगीक शोशण अश्या थळाव्यां कायद्यांचो आसपाव ना. गुन्यांवांचो तपास लावपाची टक्केवारी ८५.७५ इतकी आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
