आयज आनी फाल्यां उटंगाराचो पावस

भांगरभूंय | प्रतिनिधी

पणजी: फाटले कांय दीस गोंयांत उटंगाराचो पावस पडलो. सोमारा पावसान थोडोसो विसव घेतलो. अशें आसलें तरी वादळी वाऱ्यान कांय सुवातांनी झाडां पडपाच्यो घडणुको घडल्यो. हवामान खात्यान गोंयांत 17 आनी 18 जून मजगतीं उटंगाराच्या पावसाची शक्यताय उक्तायल्या. ते प्रमाण ह्या दोन दिसां खातीर ऑरेंज अलर्ट जारी केला. जाल्यार 19 ते 22 मजगतीं पावसाचो यलो अलर्ट दिला.

पावसान विसव घेतिल्ल्यान गोंयांतल्या चडांत चड तापमानांत वाड जाल्या. सोमारा पणजे चडांत चड 31.6 अंश जाल्यार उण्यांत उणें 24.8 अंश सेल्सियस तापमानाची नोंद जाली.

मुरगांवां चडांत चड तापमान 28.8 अंश जाल्यार उण्यांत उणें 25.6 अंश सेल्सियस तापमान उरलें. फुडले पांच दीस चडांत चड तापमान 30 ते 31 अंश आनी उण्यांत उणें तापमान 25 अंश सेल्सियस मजगतीं उरपाची शक्यताय हवामान खात्यान उक्तायल्या.

गोंयांत चोवीस वरांत 3.69 इंच पावसाची नोंद जाली. ह्या वेळार धारबांदोड्यां 6.55 इंच, सांखळे 4.85 इंच, म्हापश्यां 4.48 इंच, पेडण्यां 4.34 इंच पावसाची नोंद जाली. गोंयांत 1 ते 16 जून मजगतीं सरासरी 18.88 इंच पावसाची नोंद जाल्या. अंदूं पावसाचें प्रमाण 18.3 टक्क्यांनी चड आसा. ह्या काळांत धारबांदोड्यां सगल्यांत चड 25.97 इंच पावसाची नोंद जाल्या. उपरांत फोंड्यां 23.66 इंच, काणकोणां 23.18 इंच पावसाची नोंद जाल्या.