आयच्यान राष्ट्रकूल खेळां सर्तीक सुरवात

भांगरभूंय | प्रतिनिधी

राष्ट्रकूल खेळां सर्तीक आयच्यान सुरवात जाता. इंग्लंडाच्या बर्मिंगहॅमांत सर्त जातली. हे सर्ती खातीर भारताचो पंगड आदींच बर्मिंगहॅमांत पावला. पूण, भारताच्या साबार स्टार खेळगड्यांक ही सर्त चुकतली. ताका लागून भारताक कांय पदकां हुलकावणी दिवपाक शकतात.

टोकियो ऑलिम्पिकांत भांगरा पदक जिखपी आनी हालींच सोंपिल्ले संवसारीक अॅथलेटिक्स वस्तादपण सर्तींत रुप्या पदक जिखपी भालोफेक खेळगडो नीरज चोपडा, संवसारीक वस्ताद बॉक्सर मेरी कॉम आनी बॅडमिंटन खेळगडी सायना नेहवाल हांचे सयत साबार स्टार खेळगडे खेळटना दिसचे नात.

राष्ट्रकूल खेळां सर्ती खातीर 322 वांगड्यांचो भारतीय दळ आदींच जाहीर केला. भारतीय ऑलिम्पीक असोसिएशनान ह्या दळांत 215 खेळगड्यांचो आस्पाव केला जाल्यार 107 अधिकारी आनी सहाय्यक कर्मचारी आसतले.

नीरज चोपडाक दुखापत जाल्ल्यान ही सर्त चुकतली. बॉक्सर मेरी कॉम धोंपराचे दुखापती कडेन झुजता. तिणें फाटले राष्ट्रकूल खेळांत भांगरा पदक जिखिल्लें. हे खेपे निवड चांचणेंत ती जखमी जाल्ली.

बॅडमिंटन खेळगडी सायना नेहवालान 2010 आनी 2018ची राष्ट्रकूल खेळां सर्त जिखिल्ली. हे खेपे वादाक लागून ती सर्तींतल्यान भायर आसा. दुखापतीक लागून आनी थकिल्ल्यान तिणें निवड चांचणेंत वांटो घेवंक नाशिल्लो. तरी आसतना तिका राष्ट्रकूल खेळांत सर्तींत खेळपाक जाय आशिल्लें. पूण, नेमांक लागून तिका संद मेळूंक ना.

भारताच्या बायलांच्या हॉकी पंगडाची स्टार स्ट्रायकर राणी रामपाला बगर भारताक खेळचें पडटलें. ती पुर्ण तंदुरुस्त ना. शॉट पूट खेळगडो तेजिंदरपाल सिंग फाटीचे दुखापतीक लागून खेळा पसून पयस आसा. थॉमस करंड सर्तींत इतिहासीक जैत मेळोवपी बॅडमिंटन खेळगडो एच एस प्रणॉय राष्ट्रकूल खेळांत सुवात मेळोवपाक अपेशी थारला. ताची 10 वांगड्यांच्या बॅडमिंटन पंगडांत निवड जावंक नाशिल्ली. ह्या पंगडांत किदाम्बी श्रीकांत, पी व्ही सिंधू, लक्ष्य सेन, आकर्षी कश्यप हांची एकोड्या मॅचीं खातीर निवड केल्या